រាជធានីភ្នំពេញ ៖ ប្រទេសចិនសន្យាផ្តល់វ៉ាក់សាំងការពារជំងឺកូវីដ-១៩ ដល់កម្ពុជា និងបណ្តាប្រទេសផ្សេងទៀត នៅតាមដងទន្លេមេគង្គ នៅពេលដែល វ៉ាក់ត្រូវដាក់ឱ្យប្រើប្រាស់ផ្លូវការ នាពេលខាងមុខនេះ ។
ការប្រកាសបែបនេះ ត្រូវបានធ្វើឡើងដោយលោក លី ខឺឈាង នាយករដ្ឋមន្ត្រីចិន ក្នុងកិច្ចប្រជុំកំពូលមេគង្គ-ឡានឆាងលើកទី៣ នាព្រឹកថ្ងៃចន្ទ ទី២៤ ខែសីហា ឆ្នាំ២០២០ គឺប្រទេសឡាវធ្វើជាម្ចាស់ផ្ទះ រៀបចំកិច្ចប្រជុំ ដែលមានលោក ថងលូន ស៊ីស៊ូលីត នាយករដ្ឋមន្ត្រីឡាវ និងលោក លី ខឺឈាង នាយករដ្ឋមន្ត្រីចិន ធ្វើជាសហប្រធាននៃកិច្ចប្រជុំ ក្រោមមូលបទ «ពង្រឹងភាពជាដៃគូ ដើម្បីវិបុលភាពរួម» ។
លោកនាយករដ្ឋមន្ត្រីចិន បានបន្ថែមថា ប្រទេសចិន នឹងបង្កើតជំនួយពិសេសមួយ ដើម្បីលើកស្ទួយវិស័យសុខភាពសាធារណៈ ស្ថិតក្រោមយន្តការជំនួយពិសេសរបស់មេគង្គ-ឡានឆាង ហើយចិននឹងបន្តផ្តល់ជំនួយផ្នែកបរិក្ខា និងបច្ចេកទេសដល់បណ្តាប្រទេសតាមដងទន្លេមេគង្គ ដើម្បីប្រយុទ្ធប្រឆាំងនឹងជំងឺឆ្លងសកល ។
ក្នុងកិច្ចប្រជុំនោះដែរសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជាបានថ្លែងថា ការរីករាលដាលនៃជំងឺកូវីដ-១៩ ដែលជាប្រធានបទដ៏ក្ដៅបំផុតក្នុងឆ្នាំ២០២០ សម្ដេចនាយករដ្ឋមន្ត្រី ជំរុញឲ្យបង្ហាញពីសាមគ្គីភាព និងការជឿទុកចិត្តគ្នាទៅវិញទៅមក ក្នុងការប្រយុទ្ធប្រឆាំងនឹងសត្រូវរួមនេះ ដើម្បីធានាថា ជំងឺនេះនឹងមិនបំផ្លិចបំផ្លាញសេដ្ឋកិច្ច និងសុខភាពសាធារណៈ ជាពិសេស គឺមិនបំផ្លាញអនាគតប្រកបដោយវិបុលភាព សម្រាប់តំបន់យើង ។
សម្ដេចនាយករដ្ឋមន្ត្រី ហ៊ុន សែន ក៏បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់រដ្ឋាភិបាលចិន ក្នុងការផលិតវ៉ាក់សាំង និងការប្ដេជ្ញាចិត្តផ្ដល់វ៉ាក់សាំងនេះ ក្នុងតម្លៃមួយសមស្របសម្រាប់ប្រទេសកំពុងអភិវឌ្ឍន៍ ៕
