ទីក្រុងវ៉ាស៊ីនតោន ៖ សហរដ្ឋអាមេរិកបានព្យាយាមផ្តួចផ្តើមយន្តថ្មីក្នុងការដាក់ទណ្ឌកម្មដែលមានគោលបំណងរារាំងការដកទណ្ឌកម្មលើការលក់អាវុធពីបណ្តាប្រទេសនានាទៅឱ្យប្រទេសអ៊ីរ៉ង់ ដែលនឹងផុតកំណត់នៅរដូវស្លឹកឈើជ្រុះនេះ ។
ទោះជាយ៉ាងណាការផ្តួចផ្តើមយន្តការថ្មីនេះត្រូវបានជំទាស់ដោយបណ្តាប្រទេសដែលមានដូចជា រុស្ស៊ី ចិន និងអ៊ីរ៉ង់ ដោយហេតុថា សហរដ្ឋអាមេរិកបានបាត់បង់សិទ្ធិផ្តួចផ្តើមយន្តការនេះតាំងពីឆ្នាំ២០១៨ ។ នេះបើយោងតាមប្រភពពីទីភ្នាក់ងារសារព័ត៌មាន Sputnik ដែលបានចេញផ្សាយកាលពីថ្ងៃទី២១ ខែសីហា ឆ្នាំ២០២០ ។
រដ្ឋមន្ត្រីក្រសួងការបរទេសសហរដ្ឋអាមេរិកលោក Mike Pompeo បានប្តេជ្ញានៅក្នុងបទសម្ភាសន៍ជាមួយ Fox News ថា ទីក្រុងវ៉ាស៊ីនតោននឹងប្រើគ្រប់មធ្យោបាយដែលមាននៅក្នុងការកំណត់របស់ខ្លួនដើម្បីរារាំងចិន និងរុស្ស៊ី ពីការរំលោភលើទណ្ឌកម្មដែលបានដាក់លើការលក់អាវុធទៅឱ្យអ៊ីរ៉ង់ ។
លោក Pompeo បានសម្តែងការខកចិត្តបន្ថែមទៀត ចំពោះសកម្មភាពរបស់សម្ព័ន្ធមិត្តរបស់ខ្លួននៅក្នុងក្រុមប្រឹក្សាសន្តិសុខអង្គការសហប្រជាជាតិដែលមិនគាំទ្រដល់ចេតនារបស់សហរដ្ឋអាមេរិកក្នុងការផ្តួចផ្តើមយន្តការដាក់ទណ្ឌកម្មប្រឆាំងនឹងអ៊ីរ៉ង់ ។ រដ្ឋមន្ត្រីក្រសួងការបរទេសសហរដ្ឋអាមេរិករូបនេះធ្លាប់បានគំរាមដាក់ទណ្ឌកម្មប្រឆាំងនឹងប្រទេសណាដែលប្រឆាំងនឹងគោលបំណងនេះ ៕
ប្រភព ៖ Sputnik , ដោយ ៖ សំណាង