ទីក្រុងវ៉ាស៊ីនតោន ៖ មន្ត្រីគយ និងការពារព្រំដែនអាមេរិក-ម៉ិកស៊ិក (CBP) បាននិយាយថា សហរដ្ឋអាមេរិកកាលពីថ្ងៃសុក្រ ទី២១ ខែសីហា ឆ្នាំ២០២០ បានបិទច្រកផ្លូវនៅតាមកំពង់ផែ នៃច្រកចូលព្រំដែនជាមួយប្រទេសម៉ិកស៊ិកដើម្បីធ្វើការត្រួតពិនិត្យលើដំណើរឆ្លងដែនដែលមិនចាំបាច់ដើម្បីការពារការឆ្លងវីរុស Covid-19 ។ នេះបើយោងតាមប្រភពពីទីភ្នាក់ងារសារព័ត៌មាន Reuters ដែលបានចេញផ្សាយនាព្រឹក ថ្ងៃទី២២ ខែសីហា ឆ្នាំ២០២០ នេះ ។
សហរដ្ឋអាមេរិកបានរឹតត្បិតការធ្វើដំណើរឆ្លងដែនដែលមិនចាំបាច់ត្រូវនៅតាមព្រំដែនរវាងប្រទេសអាមេរិក និងម៉ិកស៊ិកចាប់តាំងពីខែមីនាមកម៉្លេះ ប៉ុន្តែពលរដ្ឋអាមេរិក និងអ្នកដែលរស់នៅអចិន្រ្តៃយ៍នៅតែអាចចេញចូលសហរដ្ឋអាមេរិកពីម៉ិកស៊ិកបាន ។
តាមប្រភពមន្ត្រីគយ និងការពារព្រំដែនអាមេរិក-ម៉ិកស៊ិក (CBP) បាននិយាយថា វិធានការណ៍រឹតត្បិតថ្មី គឺសំដៅទៅលើអ្នកធ្វើដំណើរទាំងអស់នោះ ។
ប្រធានាធិបតីសហរដ្ឋអាមេរិកលោក ដូណាល់ ត្រាំ ដែលនឹងត្រូវប្រឈមមុខនឹងការបោះឆ្នោតប្រធានាធិបតីអាណត្តិថ្មីនៅថ្ងៃទី៣ ខែវិច្ឆិកា ឆ្នាំ២០២០ ខាងមុខបានចាត់វិធានការជាច្រើនដើម្បីធ្វើមាត្រដ្ឋានអន្តោប្រវេសន៍ក្នុងកំឡុងពេលផ្ទុះជំងឺរាតត្បាត Covid-19 រួមទាំងច្បាប់ព្រំដែនបន្ទាន់ដែលអនុញ្ញាតឱ្យអាជ្ញាធរសហរដ្ឋអាមេរិករារាំងជនចំណាកស្រុកនៅតាមព្រំដែនផងដែរ ។
សូមបញ្ជាក់ផងដែរថា បច្ចុប្បន្នសហរដ្ឋអាមេរិកកំពុងឈរនៅលេខ១លើពិភពលោកដែលមានអ្នកស្លាប់ដោយសារជំងឺ Covid-19 ច្រើនជាង ១៧៤.០០០ នាក់ បន្ទាប់មកគឺប្រេស៊ីលមាន ១១២.០០០ នាក់ និងម៉ិកស៊ិកមាន ៥៩.០០០ នាក់ ៕
ប្រភព ៖ Reuters , ដោយ ៖ សំណាង
