រាជធានីភ្នំពេញ ៖ រដ្ឋបាលរាជធានីភ្នំពេញ បានបញ្ជាទិញរថយន្តដឹកសំរាម ចំនួន ៧០គ្រឿង ដើម្បីដោះស្រាយបញ្ហាកកស្ទះសំរាមក្នុងក្រុងភ្នំពេញ និងដើម្បីប្រតិបត្តិការសំអាតបរិស្ថាន ។
នៅថ្ងៃទី១២ សីហានេះ លោក ជិន ប៊ុនធឿន និង លោក កែពន្លក នាយករងរដ្ឋបាលសាលារាជធានីភ្នំពេញ បានចុះហត្ថលេខាលើឯកសារប្រគល់-ទទួល រថយន្តដឹកសំរាម ចំនួន៥០គ្រឿង ដែលជាការបញ្ជាទិញរបស់សាលារាជធានីភ្នំពេញ ។
បើតាមលោក ជិន ប៊ុនធឿន សាលារាជធានីភ្នំពេញ បានបញ្ជាទិញរថយន្តដឹកសំរាម សរុបចំនួន៧០គ្រឿង ដោយពិធីប្រគល់-ទទួល លើកទី១ មានចំនួន ២០គ្រឿង ហើយលើកទីពីរនេះ មានចំនួន៥០គ្រឿង ។
លោក ជិន ប៊ុនធឿន បានបញ្ជាក់ថា ការបញ្ជាទិញរថយន្តដឹកសំរាមនេះ គឺគោលបំណងដើម្បីចូលរួមចំណែកដោះស្រាយ និងអន្ដរាគមន៍នៅពេលមានបញ្ហាកកស្ទះសំរាមក្នុងរាជធានីភ្នំពេញ និងមួយផ្នែកទៀត ដើម្បីចូលរួមក្នុងការសំអាតបរិស្ថាន-សំណល់ផ្សេងៗក្នុងរាជធានីភ្នំពេញ ឱ្យមានសោភ័ណភាពល្អប្រសើរ ស័ក្តិសមជាទីក្រុងស៊ីវីល័យ និងជាបេះដូងនៃព្រះរាជាណាចក្រកម្ពុជា ៕
