តាមប្រភពប៉ូលិសរដ្ឋ Kerala បានឲ្យដឹងថា គិតត្រឹមម៉ោង១២និង០០យប់រំលងអធ្រាត្រឈានចូលថ្ងៃទី០៨ ខែសីហា ឆ្នាំ២០២០ នេះមានមនុស្សយ៉ាងតិច ១៥ នាក់ត្រូវបានស្លាប់ និង៣៥នាក់ទៀតរងរបួសថែមទាំងមានមនុស្សកំពុងជាប់គាំងក្នុងយន្តហោះនៅក្នុងសោកនាដកម្មធ្លាក់យន្តហោះដឹកអ្នកដំណើររបស់ក្រុមហ៊ុនអាកាសចរណ៍ Air India Express ។ នេះបើយោងតាមប្រភពពីទីភ្នាក់ងារសារព័ត៌មាន Reuters ដែលបានចេញផ្សាយនៅយប់រំលងអធ្រាត្រឈានចូលថ្ងៃទី០៨ ខែសីហា ឆ្នាំ២០២០ នេះ ។
ក្រសួងអាកាសចរណ៍ស៊ីវិលបាននិយាយនៅក្នុងសេចក្តីថ្លែងការណ៍មួយថា យន្តហោះដឹកអ្នកដំណើរដែលធ្លាក់ជាប្រភេទយន្តហោះ Boeing-737 ដែលហោះហើរពីទីក្រុងឌូបៃទៅកាន់ប្រទេសឥណ្ឌាដោយមានអ្នកដំណើរ និងនាវិកចំនួន ១៩១ នាក់នៅលើយន្តហោះ និងមានទារកចំនួន ១០ នាក់នៅលើយន្តហោះ ។
អាជ្ញាធរបាននិយាយថា យន្តហោះដឹកអ្នកដំណើរ Boeing-737 នេះបានដាច់ជាពីរកំណាត់ក្រោយធ្លាក់ចូលក្នុងជ្រលងភ្នំទាំងមេឃកំពុងភ្លៀងខ្លាំង ខណៈនេះក្រុមជួយសង្គ្រោះកំពុងតែនៅកន្លែងកើតហេតុដើម្បីជួយសង្គ្រោះអ្នកដំណើរដែលជាប់គាំងនៅក្នុងយន្តហោះ ។
ភ្លាមៗក្រោយកើតហេតុលោករដ្ឋមន្ត្រីឥណ្ឌា A. C. Moideen បាននិយាយថា លោកកំពុងធ្វើដំណើរទៅកាន់កន្លែងកើតហេតុធ្លាក់យន្តហោះនោះបន្ទាប់ពីត្រូវបានស្នើសុំឱ្យដឹកនាំកិច្ចខិតខំប្រឹងប្រែងជួយសង្គ្រោះជនរងគ្រោះ ។
សូមបញ្ជាក់ផងដែរថា យន្តហោះដឹកអ្នកដំណើរ Boeing-737 ដែលមានជើងហោះហើរពិសេសពីឌូបៃទៅកាន់ប្រទេសឥណ្ឌានេះ គឺជាជើងហោះហើរធ្វើមាតុភូមិនិវត្តន៍ដែលត្រូវបានគ្រប់គ្រង និងអនុញ្ញាតដោយរដ្ឋាភិបាល ដើម្បីនាំជនជាតិឥណ្ឌាដែលនៅឯនាយសមុទ្រត្រឡប់ទៅកាន់ប្រទេសឥណ្ឌាវិញក្នុងអំឡុងពេលនៃការរឹតត្បិតការធ្វើដំណើរអន្តរជាតិដោយសារតែការរីករាលដាលជំងឺ Covid-19 ៕
First videos fingers crossed PIC has passed away #AirIndiaExpress #Calicut pic.twitter.com/ZxZqq5OrfH
— Aditya Chaudhary ✈️ (@aditya_chaudry) August 7, 2020
2nd video #AirIndiaExpress #Calicut #IX1344 pic.twitter.com/5MJNZeXSvU
— Aditya Chaudhary ✈️ (@aditya_chaudry) August 7, 2020
ប្រភព ៖ Reuters , ដោយ ៖ សំណាង