ក្រុមហ៊ុនអាកាសចរណ៍ Vietjet Air របស់វៀតណាមបានរាយការណ៍អំពីការខាតបង់ទឹកប្រាក់៨៦លានដុល្លារអាមេរិក នៅក្នុងឆមាសទីមួយ នៃឆ្នាំ២០២០ ។ ចំនួននេះត្រូវបានប្រកាសនៅក្នុងរបាយការណ៍ចំណូលនៃក្រុមហ៊ុនអាកាសចរណ៍ Vietjet Air ដែលរងផលប៉ះពាល់យ៉ាងធ្ងន់ធ្ងរដោយ Covid-19 ។ នេះបើយោងតាមប្រភពពីទីភ្នាក់ងារវៀតណាម dtinews ដែលបានចេញផ្សាយកាលពីថ្ងៃទី០៤ ខែសីហា ឆ្នាំ២០២០ ។
ក្រុមហ៊ុន Vietjet បានព្យាយាមពង្រីកបណ្តាញក្នុងស្រុករបស់ខ្លួនដល់៥២ជើង និង១៤០០០ជើងហោះហើរទៀតដែលអាចបម្រើអ្នកដំណើរបានជាង២លាននាក់នៅក្នុងត្រីមាសទី២ ។ នៅចុងត្រីមាសនេះប្រាក់ចំណូលរបស់ក្រុមហ៊ុនអាកាសចរណ៍ Vietjet Air មានត្រឹមតែ៨២លានដុល្លារអាមេរិក ថយចុះ ៥៤% បើប្រៀបធៀបនឹងរយៈពេលដូចគ្នាកាលពីឆ្នាំមុន ។
កាលពីខែមេសាកន្លងទៅនេះ ក្រុមហ៊ុន Vietjet បានបើកដំណើរការសេវាកម្មដឹកទំនិញ និងជើងហោះហើរពិសេស ។ Vietjet គឺជាក្រុមហ៊ុនអាកាសចរណ៍ដំបូងគេដែលត្រូវបានអនុញ្ញាតឱ្យដឹកទំនិញនៅក្នុងកាប៊ីនយន្ដហោះ ។ នៅក្នុងលទ្ធផលអាជីវកម្មសម្រាប់ត្រីមាសទី១របស់ក្រុមហ៊ុនអាកាសចរណ៍ Vietjet Air បានប្រកាសថា បានខាតបង់ប្រាក់ជាច្រើនបន្ទាប់ពីចំនួនអ្នកដំណើរបានធ្លាក់ចុះ២២%បើប្រៀបធៀបទៅនឹងរយៈពេលដូចគ្នាកាលពីឆ្នាំមុនដោយសារតេផលប៉ះពាល់នៃជំងឺរាតត្បាត Covid-19 ៕
ប្រភព ៖ dtinews , ដោយ ៖ សំណាង
