វៀតណាម ៖ ដើម្បីទប់ស្កាត់ការចម្លងរីករាលដាល នៃជំងឺ COVID-19 អាជ្ញាធរទីក្រុងហូជីមិញ នឹងចាប់ផ្តើមផាកពិន័យដល់អ្នកដែលមិនពាក់ម៉ាសនៅទីសាធារណៈ ចាប់ពីថ្ងៃទី០៥ ខែសីហា ពោលគឺស្អែកនេះតទៅហើយ នេះបើយោងតាមសារព័ត៌មានរបស់វៀតណាម vietnaminsider ។
លោក Nguyen Thanh Phong ប្រធានគណៈកម្មាធិការប្រជាជន បានប្រកាសការផាកពិន័យនេះ នៅក្នុងកិច្ចប្រជុំតាមអនឡាញមួយ ដែលស្តីពីការការពារ និងទប់ស្កាត់ជំងឺ COVID-19 កាលពីព្រឹកថ្ងៃចន្ទ ម្សិលមិញ ។
លោក Tran Duc Tai អនុប្រធាននាយកដ្ឋានប៉ូលីស នៃទីក្រុងហូជីមិញ ក៏បាននិយាយដែរថា ប្រជាជនវៀតណាមប្រមាណជា ២០% មិនបានពាក់ម៉ាស់ នៅទីសាធារណៈទេ ហើយការជួបជុំមនុស្សលើសពី៣០នាក់ ក៏ជារឿងធម្មតារបស់ ប្រជាជនវៀតណាមដែរ ។
នៅក្នុងកិច្ចប្រជុំនោះលោក Nguyen Thanh Phong បានស្នើឱ្យប៉ូលីស និងភ្នាក់ងារដែលពាក់ព័ន្ធ ពិនិត្យមើលអ្នកណាដែលមិនពាក់ម៉ាស់ និងដាក់ពិន័យរដ្ឋបាល ទៅលើអ្នករំលោភបំពាននោះ ។ យ៉ាងណាការផាកពិន័យចំនួនទឹកប្រាក់ប៉ុន្មាននោះ គេនៅពុំទាន់ដឹងនៅឡើយ ។
គិតត្រឹមថ្ងៃទី០៤ ខែសីហា ឆ្នាំ២០២០នេះ ប្រទេសវៀតណាមមានករណីឆ្លង COVID-19 សរុបចំនួន ៦៧០ករណី ក្នុងនោះមានអ្នកស្លាប់ចំនួន៨នាក់ និងជាសះស្បើយចំនួន ៣៧៨នាក់ ៕
