ខេត្តកណ្តាល ៖ បុរសដែលជាអតីតគូដណ្តឹងរបស់នារីរងគ្រោះត្រូវបានសមត្ថកិច្ចឃាត់ខ្លួន និងកោះហៅទៅសួរនាំក្រោយពីបានចែកចាយរូបភាពអាសអាភាសរបស់នារីរងគ្រោះគ្រាដែលរួមរស់ជាមួយគ្នាជាសាធារណៈតាមបណ្តាញសង្គមហ្វេសប៊ុក ។ ហេតុនេះកើតឡើងកាលពីវេលាម៉ោង០៩និង៣០នាទី ថ្ងៃទី២៨ ខែកក្កដា ឆ្នាំ២០២០ ស្ថិតនៅភូមិជ្រលង ឃុំត្បែង ស្រុកកណ្ដាលស្ទឹង រហូតដល់ថ្ងៃទី០២ ខែសីហា ឆ្នាំ២០២០ ទើបសមត្ថកិច្ចឃាត់ខ្លួនសួរនាំ ។
ជនរងគ្រោះឈ្មោះ ស.ក.ន ភេទស្រី អាយុ១៨ឆ្នាំ ជនជាតិខ្មែរ ដែលមានទីលំនៅភូមិជ្រលង ឃុំត្បែង ស្រុកកណ្តាលស្ទឹង ខេត្តកណ្តាល មុខរបរជាងអ៊ុតសក់ ។ រីឯជនសង្ស័យឈ្មោះ អ៊ាក ស៊ីម ភេទប្រុស អាយុ១៩ឆ្នាំ ជនជាតិខ្មែរ មានទីលំនៅភូមិស្វាយមីង ឃុំបារគូ ស្រុកកណ្តាលស្ទឹង ខេត្តកណ្តាល មុខរបរលក់ដូរ បានប្រើប្រាស់គណនីហ្វេសប៊ុកចំនួន២ដែលមានឈ្មោះ Oun Naa មិនមានដាក់រូបភាពលើ Profile និងឈ្មោះ Sim Amm ។
តាមរបាយការណ៍របស់សមត្ថកិច្ចបានឲ្យដឹងសភាពរឿងហេតុថា កាលពីថ្ងៃទី២៨ ខែកក្កដា ឆ្នាំ២០២០ មានអាខោន ហ្វេសប៊ុកដែលដាក់ឈ្មោះ Oun Naa បានផ្ញើរូបអាក្រាតកាយរបស់នារីរងគ្រោះដែលជារូបអាក្រាតថតជាវីដេអូដោយធ្លាប់បានផ្ញើទៅឲ្យអតីតគូដណ្តឹងរបស់នារីរងគ្រោះឈ្មោះ អ៊ាក ស៊ីម ដែលប្រើអាខោនហ្វេសប៊ុកឈ្មោះ Sim Amm តែម្នាក់គត់ ។
ប៉ុន្តែមានអាខោនឈ្មោះ Oun Naa ដែលនារីរងគ្រោះមិនស្គាល់បែរជាយករូបថតនោះផ្ញើចែកចាយឲ្យមីងរបស់ជនរងគ្រោះឈ្មោះ គឹម ហ័ង ដែលប្រើអាខោនហ្វេសប៊ុកឈ្មោះ ហ័ង ប៊ីយូធីសាឡន, មិត្តភក្តិឈ្មោះ Na Ry, ឈ្មោះ Mo Ly , ឈ្មោះ ling Black និងប្អូនប្រុសបង្កើតរបស់ជនរងគ្រោះឈ្មោះ Pa Neang ។ ក្រោយដឹងរឿង នៅថ្ងៃទី៣១ ខែកក្កដា ឆ្នាំ២០២០ ជនរងគ្រោះក៏បានទៅដាក់ពាក្យបណ្ដឹងសូមឲ្យសមត្ថកិច្ចជួយស្រាវជ្រាវ ។
តាមលទ្ធផលស្រាវជ្រាវស៊ើបអង្កេត តាមចម្លើយសារភាពរបស់ឈ្មោះ អ៊ាក ស៊ីម បានឲ្យដឹងថា នៅថ្ងៃទី០៨ ខែកុម្ភៈ ឆ្នាំ២០២០ ឈ្មោះ អ៊ាក ស៊ីម ភេទប្រុស អាយុ១៩ឆ្នាំ បានស្រឡាញ់គ្នាជាមួយជនរងគ្រោះបានរយៈពេល៣ខែ និងដេកនៅជាមួយគ្នា រហូតដល់ថ្ងៃទី២០ ខែឧសភា ឆ្នាំ២០២០ អ្នកទាំងពីរបានភ្ជាប់ពាក្យជាមួយគ្នា បានប្រហែល១ខែក៏បានផ្តាច់ពាក្យវិញ ។
លុះដល់ថ្ងៃទី២៧ ខែកក្កដា ឆ្នាំ២០២០ ឈ្មោះ អ៊ាក ស៊ីម បានបង្កើតអាខោនហ្វេសប៊ុកថ្មីមួយដាក់ឈ្មោះ Oun Naa ក្នុងគោលបំណងដើម្បីផ្ញើរូបភាពអាក្រាតកាយជាវីដេអូទៅជនរងគ្រោះ (អតីតគូរដណ្តឹង) មើល ប៉ុន្តែដោយសារជនរងគ្រោះមិនមានទូរស័ព្ទលេងហ្វេសប៊ុក ទើបផ្ញើរូបនោះទៅមីងរបស់ជនរងគ្រោះដែលមានអាខោនហ្វេសប៊ុកឈ្មោះ ហ័ងប៊ីយូធីសាឡន, មិត្តភក្តិប្រើអាខោនហ្វេសប៊ុកឈ្មោះ Na Ry និងអាខោនឈ្មោះ Peng Pos ដែលធ្វើការជាមួយជនរង គ្រោះមើល និងថែមទាំងប្រើពាក្យគំរាមថា ចង់ល្បីម្តងទៀតមែន ។ ករណីនេះការិយាល័យនគរបាលព្រហ្មទណ្ឌកម្រិតស្រាលបានកសាងសំណុំរឿងបន្តចាត់ការតាមនីតិវិធី ៕