រាជធានីភ្នំពេញ ៖ បុរសជាមេការបុរីម្នាក់បានដកកាំភ្លើងបាញ់គំរាមក្រុមកម្មករចំនួន២គ្រាប់បណ្តាលឲ្យកម្មករម្នាក់រងរបួសជើង ក្រោយពីក្រុមកម្មករទារបើកលុយថ្លៃដាក់លូចំនួន៥០០ដុល្លារ ប៉ុន្តែមេការបើកឲ្យមិនគ្រប់ទើបផ្ទុះជម្លោះមេការក្តៅចិត្តដកកាំភ្លើងបាញ់រួចជិះម៉ូតូរត់គេចខ្លួនបាត់តែម្តង ។ ករណីនេះបង្កឲ្យមានការភ្ញាក់ផ្អើលឡើងកាលពីវេលាម៉ោង៣និង១៥នាទីរសៀល ថ្ងៃទី១១ ខែកក្កដា ឆ្នាំ២០២០ នៅចំណុចក្នុងបរិវេណការដ្ឋានសំណង់បុរីខេអិន មានទីតាំងស្ថិតនៅតាមមហាវិថីឈ្នះ-ឈ្នះ ស្ថិតក្នុងភូមិស្រែតេជះ សង្កាត់សំរោងក្រោម ខណ្ឌពោធិ៍សែនជ័យ។
ជនរងគ្រោះឈ្មោះ ប៊ុន ច័ន្ទតុលា ភេទប្រុស អាយុ៣៣ឆ្នាំ មុខរបរកម្មករសំណង់បុរីខាងលើ ផ្នែកខាងប្រព័ន្ធលូ មានលំនៅភូមិប្រាសាទ សង្កាត់ស្នោរ ខណ្ឌកំបូល ។ ចំណែកជនបង្កជាខ្មាន់កាំភ្លើង មានឈ្មោះ អ៊ឹង ឆេងវ៉េង ភេទប្រុស អាយុ៤០ឆ្នាំ មុខរបរជាមេការសំណង់បុរីខេអិន ក្រោយផ្ទុះអាវុធរួច ក៏ជិះម៉ូតូគេចខ្លួនបាត់ស្រមោល។
តាមសម្តីជនរងគ្រោះបានរៀបរាប់ប្រាប់ថា នៅមុនពេលកើតហេតុក្រុមការងាររបស់គាត់បានរៀបចំដាក់ប្រព័ន្ធលូឱ្យខាងបុរី ខេអិន និងត្រូវបើកលុយ៥០០ដុល្លារ ហើយថ្ងៃសៅរ៍ជាថ្ងៃចុងសប្តាហ៍ មេការខាងលើបានហៅគាត់ឱ្យមកបើកលុយ លុះនៅវេលាម៉ោងខាងលើគាត់មកសុំបើកលុយ៥០០ដុល្លារ ស្រាប់តែមេការឱ្យតែ១៥០ដុល្លារទេ ទើបធ្វើឱ្យគាត់បានតវ៉ាថាលុយ១៥០ដុល្លារ ធ្វើយ៉ាងម៉េចបើកចែកឱ្យក្រុមកម្មករគ្រប់ទៅ ។
រួចក៏ឈានទៅដល់ការតមាត់គ្នាផ្ទុះជាជម្លោះតឹងសរសៃក ស្រាប់តែភ្លាមនោះជនដៃដល់ផ្ទុះកំហឹងក៏ទាញកាំភ្លើងខ្លីមិនស្គាល់ម៉ាក បាញ់ភ្ជុចផ្លូវបេតុងចំនួន២គ្រាប់ បណ្តាលឱ្យផ្លាតខ្ទាតត្រូវចំជើងជនរងគ្រោះហូរឈាមរងរបួសតែម្តង។ ភ្លាមៗនោះជនដៃដល់ក៏ទាញម៉ូតូជិះគេចទៅបាត់បង្កឱ្យភ្ញាក់ផ្អើលតែម្តង ។
ក្រោយកើតហេតុភ្លាមៗ កម្លាំងនគរបាលប៉ុស្តិ៍ កម្លាំងជំនាញខណ្ឌចុះទៅសាកសួរ ពិនិត្យស្លាកស្នាមបន្សល់ទុក ហើយរកឃើញសំបកគ្រាប់១ ដែលស្គាល់ជាសំបកគ្រាប់កាំភ្លើង Lock ។ ចំណែកសំបកគ្រាប់មួយទៀត ជនរងគ្រោះអះអាងថា ជនសង្ស័យរើសយកដាក់ហោប៉ាវ មុនគេចខ្លួន ៕