ខេត្តត្បូងឃ្មុំ ៖ សង្ស័យម្នាក់ត្រូវបានគេស្គាល់ថា មន្ត្រីនគរបាលខេត្តត្បូងឃ្មុំ បានដកកាំភ្លើង បាញ់សម្លាប់នារីរងគ្រោះ បណ្តាលអោយស្លាប់ ពេលបញ្ជូនទៅមន្ទីរពេទ្យ កាលពីវេលាម៉ោង៨ និង១៦នាទីយប់ នៅថ្ងៃទី០៩ ខែកក្កដា ឆ្នាំ២០២០ ស្ថិតនៅចំណុចមុខហាងខារ៉ាអូខេយីហោ«ហ្គោក្លឹប» ស្ថិតក្នុងភូមិជីមាន់កណ្តាល ឃុំក្រែក ស្រុកពញាក្រែក ខេត្តត្បូងឃ្មុំ ។
ប្រភពព័ត៌មានពីសមត្ថកិច្ចបានឱ្យដឹងជាបឋមថា ជនសង្ស័យមានឈ្មោះ មូល ទិត្យឧត្តម អាយុ៣៥ឆ្នាំ ជាមន្ត្រីនគរបាលខេត្តត្បូងឃ្មុំ ។ ចំណែកឯនារីរងគ្រោះឈ្មោះ ហេង សុខហ៊ាប អាយុ២០ឆ្នាំ ។
បន្ទាប់ពីធ្វើសកម្មភាពបាញ់សម្លាប់នារីរងគ្រោះរួចហើយ ជនសង្ស័យបានបើករថយន្តគេចខ្លួន ប៉ុន្តែសំណាងអាក្រក់ ជ្រុលទៅបុករថយន្ត១គ្រឿងទៀត បណ្តាលអោយរងរបួសធ្ងន់ធ្ងរ ។
ក្រោយកើតហេតុ កម្លាំងនគរបាលស្រុកពញាក្រែក បានបញ្ជូនជនដៃដល់ទៅមន្ទីរពេទ្យបង្អែក ដោយមានកម្លាំងសមត្ថកិច្ចចំនួន០៤នាក់ នៅចាំតាមយាមជនល្មើស ផងដែរ ។
យ៉ាងណាករណីបាញ់ប្រហារនេះ នៅមិនទាន់មានការបញ្ជាក់ច្បាស់លាស់ថា បណ្ដាលមកពីមូលហេតុអ្វីនោះទេ ៕
