ក្លិបសេះបង្កង់ Juventus ដែលដឹកនាំដោយលោក Maurizio Sarriកំពុងបន្ដក្ដីសង្ឃឹមក្នុងការបង្កើតកំណត់ត្រាឈ្នះពានក្នុងលីគ៩រដូវកាលជាប់គ្នា ដោយទើបតែប្រកួតឈ្នះក្រុម Genoa ក្នុងលទ្ធផល 3-1 ដែលជ័យជំនះនេះបានបន្ដជួយឲ្យពួកគេមានគំលាត៤ពិន្ទុពីក្រុមលេខ២ Lazio ដែលទើបតែបានយកឈ្នះក្រុម Torino 2-1 ។
បន្ទាប់ពីបានបរាជ័យក្នុងការប្រកួតធ្វើឲ្យបាត់បង់ពាន Coppa Italia នៅក្នុងវគ្គផ្ដាច់ព្រ័ត្រមក ក្រុមសេះបង្កង់ទទួលបានជ័យជំនះទាំង៣ប្រកួត ចាប់តាំងពីការប្រកួតក្នុងលីគចាប់ផ្ដើម ។
ខ្សែប្រយុទ្ធ Paulo Dybala ជាអ្នករកគ្រាប់បាល់បើកឆាកនៅក្នុងការប្រកួតនោះ នៅក្នុងតង់ទី២ បន្ទាប់ពីញាក់ផុតខ្សែការពារនៅក្នុងតំបន់គ្រោះថ្នាក់ ហើយស៊ុតផុតដៃអ្នកចាំទី Mattia Perin។
៧នាទីបន្ទាប់ Cristiano រកបានគ្រាប់បាល់ទី២ជូនក្រុមភ្ញៀវសេះបង្កង់ ដោយខ្សែប្រយុទ្ធព័រទុយហ្គាល់ទទួលបានបាល់ពីពាក់កណ្ដាលតារាង ហើយបានអូសស៊ុតបានយ៉ាងល្អនៅក្រៅប្រអប់ ។
ខ្សែប្រយុទ្ធ Douglas Costa ដែលបានប្ដូរចូល រកបានគ្រាប់ទី៣ ដោយស៊ុតកោងបញ្ចូលទី ប៉ុន្ដែត្រូវបាន Andrea Pinamonti របស់ក្រុមម្ចាស់ផ្ទះ Genoa តាមបាន១គ្រាប់វិញ នៅ៣នាទីបន្ទាប់ ៕