ការទិញប្រព័ន្ធការពារមីស៊ីល S-400 របស់រុស្ស៊ីដោយក្រុងអង់ការ៉ា ប្រទេសទួរគី ធ្វើឲ្យទីក្រុងវ៉ាស៊ីនតោនដែលស្ថិតក្រោមរដ្ឋបាលរបស់លោក ដូណាល់ ត្រាំ ប្រធានាធិបតីសហរដ្ឋអាមេរិកសម្រេចបណ្តេញទួរគីចេញពីកម្មវិធីប្រយុទ្ធប្រឆាំងយន្តហោះយន្តហោះចម្បាំង F-35 និងបានគម្រាមដាក់ទណ្ឌកម្មប្រឆាំងនឹងប្រទេសនេះចំពោះការទិញអាវុធការពារដែលផលិតដោយរុស្ស៊ីដែលជាគូបដិបក្ខធំបំផុតរបស់សហរដ្ឋអាមេរិក ។ នេះបើយោងតាមប្រភពពីទីភ្នាក់ងារសារព័ត៌មាន Sputnikដែលបានចុះផ្សាយនៅថ្ងៃទី៣០ ខែមិថុនា ឆ្នាំ២០២០ នេះ ។
ដោយឡែក សមាជិកព្រឹទ្ធសភាអាមេរិកបែរជាស្នើច្បាប់ដែលអាចអនុញ្ញាតឱ្យសហរដ្ឋអាមេរិកទិញប្រព័ន្ធការពារ S-400 ដែលផលិតដោយរុស្ស៊ីពីប្រទេសទួកគីវិញ ស្របពេលដែលកំពុងមានបញ្ហារវាងទីក្រុងវ៉ាស៊ីនតោន និងទីក្រុងអង់ការ៉ា ជុំវិញបញ្ហាដែលទួកគីទិញប្រព័ន្ធការពារ S-400 របស់រុស្ស៊ីនេះ ។
សំណើនេះត្រូវបានធ្វើឡើងដោយសមាជិកព្រឹទ្ធសភាអាមេរិកលោក ចន ថុន ដែលបានធ្វើវិសោធនកម្មច្បាប់ស្តីពីការផ្តល់សិទ្ធិការពារជាតិនៅឆ្នាំ២០២១ ដែលអាចអនុញ្ញាតឱ្យទីក្រុងវ៉ាស៊ីនតោនទិញឧបករណ៍នេះតាមរយៈថវិការលទ្ធកម្មរបស់កងទ័ពសហរដ្ឋអាមេរិក ។
ប្រធានគណៈកម្មាធិការទំនាក់ទំនងព្រឹទ្ធសភាលោក Jim Risch បានឲ្យដឹងថា ការធ្វើវិសោធនកម្មដ៏តឹងរ៉ឹងអាចនឹងធ្វើឱ្យរដ្ឋបាលលោក ត្រាំ ដាក់ទណ្ឌកម្មលើប្រទេសទួរគី ក្រោមច្បាប់ស្តីពី «ទណ្ឌកម្មលើសត្រូវដែលប្រឆាំងនឹងអាមេរិក» ដែលហៅកាត់ថា «CAATSA» រយៈពេល៣០ថ្ងៃ បន្ទាប់ពីច្បាប់ NDAA ត្រូវបានអនុម័ត ។
លោក Jim Townsend អតីតមន្ត្រីមន្ទីរបញ្ចកោណនៃតំបន់អឺរ៉ុប និងអង្គការណាតូ បានថ្លែងថា ៖ «ខ្ញុំគិតថាសហរដ្ឋអាមេរិកទិញយកប្រព័ន្ធការពារ S-400 ដែលផលិតនៅរុស្ស៊ី ពីប្រទេសទួរគីវិញ គឺជាវិធីដ៏ឆ្លាតវៃមួយដើម្បីអាចធ្វើឲ្យប្រទេសទួរគីអាចចេញពីភាពជាប់គាំងរបស់ខ្លួន ។ យើងគ្រាន់តែចង់យកប្រព័ន្ធការពារមួយនេះចេញពីប្រទេសទួរគី ហើយប្រសិនបើវាជោគជ័យ វាអាចនឹងជួយឲ្យទួរគីមានភាពល្អប្រសើរឡើងវិញ» ។
សូមបញ្ជាក់ផងដែរថា ទណ្ឌកម្មលើសត្រូវដែលប្រឆាំងនឹងអាមេរិក ដែលហៅកាត់ថា «CAATSA» នឹងដាក់ទណ្ឌកម្មលើប្រទេសណាដែលទិញឧបករណ៍ការពារសំខាន់ៗពីប្រទេសរុស្ស៊ី ។ ដោយសារតែការទិញប្រព័ន្ធការពារ S-400 ដែលផលិតដោយរុស្ស៊ីរបស់ប្រទេសទួរគី សហរដ្ឋអាមេរិកបានគម្រាមដាក់ទណ្ឌកម្មប្រទេសនេះ ហើយថែមទាំងបណ្តេញប្រទេសនេះចេញពីកម្មវិធីប្រយុទ្ធប្រឆាំងយន្តហោះចម្បាំង F-35 របស់ខ្លួន និងដាក់សម្ពាធទួរគីឱ្យបោះបង់ចោលប្រព័ន្ធការពារ S-400 របស់រុស្ស៊ី ដែលប្រទេសទួរគីបានទិញកាលពីឆ្នាំ ២០១៩ ។
តែទោះជាយ៉ាងណាក្តី លោក Recep Tayyip Erdogan ប្រធានាធិបតី នៃប្រទេសទួរគី បានបដិសេធមិនធ្វើតាមអ្វីដែលសហរដ្ឋអាមេរិកបានលើកឡើងនោះទេ ហើយបានថ្លឹងថ្លែងនូវលទ្ធភាពនៃការបន្តកិច្ចសហប្រតិបត្តិការជាមួយរុស្ស៊ីលើប្រព័ន្ធការពារ S-400 បន្តទៀត ទោះបីជាមានការពន្យារពេលដែលបណ្តាលមកពីការឆ្លងរាលដាលនៃជំងឺឆ្លងវីរុសកូវីដ១៩ក៏ដោយ ៕
