ក្លិបតោខៀវ Chelsea ជាក្រុមខ្លាំងលំដាប់កំពូលមួយប្រចាំក្របខ័ណ្ឌ English Premier League និងសំបូរកីឡាករដែលមានគុណភាពលំដាប់ពិភពលោក ។ ថ្មីៗនេះយោងតាមប្រភពពីទីភ្នាក់ងារសារព័ត៌មាន Goal បានស្រង់បញ្ជីឈ្មោះកីឡាករមួយចំនួនដែល Chelsea បានលក់ចេញហើយអង្គុយស្តាយក្រោយជាខ្លាំងក្នុងការសម្រេចចិត្តលក់កីឡាករទាំងនោះ ។
1- Kevin De Bruyne
ខ្សែបម្រើប្រយុទ្ធរូបនេះត្រូវបាន Chelsea ទិញពីក្លិប Genk កាលពីឆ្នាំ២០១២ ដោយបានបង្ហាញខ្លួនឲ្យក្លិបតោខៀវបានតែ៣ប្រកួតប៉ុណ្ណោះ។ ក្រោយមក Chelsea បានឲ្យក្លិប Werder Bremen ខ្ចីជើង មុនពេលដែលក្លិប Wolfburg ទិញផ្តាច់។ ប៉ុន្មានឆ្នាំក្រោយមក ក្លិប Manchester City ក៏ទិញមករួមក្រុមដោយសារទម្រង់លេងដ៏ល្អរបស់គេ។
2- Romelo Lukaku
ក្លិប Chelsea បានបង្កើតកំហុសដ៏ធំមួយដោយឲ្យកីឡាករជើងស៊ុតរូបនេះចាកចេញទៅ Everton ។ ក្រោយមក Chelsea ក៏ព្យាយាមទិញតារាឆ្នើមរូបនេះមករួមក្រុមវិញផងដែរ ប៉ុន្តែត្រូវបានក្លិប Manchester United ទិញបានមុន ខណៈបច្ចុប្បន្នជម្រើសជាតិប៊ែលហ្សិកកំពុងធ្វើព្យុះធ្វើភ្លៀងនៅក្របខណ្ឌ Serie A ដោយជ្រកកោនជាមួយក្រុម Inter Milan។
3- Mohamed Salah
Salah បង្ហាញខ្លួនឲ្យ Chelsea បានតែ៣ប្រកួតប៉ុណ្ណោះបន្ទាប់ពីទិញរូបគេពីក្លិប Basel ។ បន្ទាប់មក Chelsea ក៏លក់រូបគេឲ្យក្លិប Roma នៅពេលនោះឯងដែល Salah ឡើងជើងយ៉ាងខ្លាំង ហើយក៏បានផ្លាស់មក Liverpool ដោយបានឈ្នះពានជាច្រើនជាមួយក្លិប ។
4-Arjen Robben
កីឡាកររូបនេះត្រូវបាន Chelsea ទិញមករួមក្លិបកាលពីអាយុ២០ឆ្នាំដោយបានឈ្នះពាន Premier League បាន២ដងជាមួយក្លិបផងដែរ។ តែរូបគេត្រូវបានក្លិប Chelsea លក់ឲ្យ Real Madrid មុនពេលទៅរួមរស់ជាមួយ Bayern Munich ក្នុងនាមជាកីឡាករកំពូលរបស់ក្លិប ។
5-Juan Mata
នៅពេលដែលក្លិប Chelsea លក់ Mata ឲ្យ Man Utd នៅឆ្នាំ២០១៤នោះ មានការខឹងសំបារជាខ្លាំងពីសំណាក់អ្នកគាំទ្រ ដោយកីឡាកររូបនេះជាអ្នកនាំលេងដ៏សំខាន់របស់ក្លិបនៅពេលនោះ ។
6-Namanja Matic
Matic ជាកីឡាករអ្នកនាំលេងនៅតំបន់បម្រើការពាររបស់ Chelsea ដ៏សំខាន់ម្នាក់ ប៉ុន្តែត្រូវបានក្លិបលក់ឲ្យក្រុមគូប្រជែង Man Utd នៅឆ្នាំ២០១៧ ដោយត្រូវបានអ្នកគាំទ្ររិះគន់យ៉ាងខ្លាំង ។
7- Daniel Sturridge
Chelsea មិនសូវដាក់កីឡាកររូបនេះឲ្យលេងជាជម្រើសទី១ច្រើននោះទេ ប៉ុន្តែរូបគេបានក្លាយជាតួរសំខាន់ម្នាក់ពេលផ្លាស់មក Liverpool ដោយបានជួយឲ្យក្លិបឈ្នះពាន Champions League នៅរដូវកាលមុនផងដែរ ។
8- Filipe Luis
កីឡាកររូបនេះមកចូលរួមជាមួយ Chelsea បានតែមួយរដូវកាលប៉ុណ្ណោះនៅឆ្នាំ២០១៤ ដោយបានបង្ហាញទម្រង់លេងមិនអន់នោះទេឲ្យក្លិប ប៉ុន្តែត្រូវបាន Chelsea លក់ឲ្យក្លិប At Madrid វិញនៅឆ្នាំ២០១៥ ៕
