រាជធានីភ្នំពេញ ៖ លោក សេង សុវណ្ណារ៉ា អតីតអនុរដ្ឋលេខាធិការក្រសួងយុត្តិធម៌ ត្រូវបានសមត្ថកិច្ចចាប់ខ្លួននៅរសៀល ថ្ងៃទី២៦ ខែមិថុនា ឆ្នាំ២០២០ នេះ ពាក់ព័ន្ធករណីរំលោភដីរាប់សិបហិកតា នៅខេត្តមណ្ឌលគិរី ។
បើតាមមន្ត្រីសាលាដំបូងរាជធានីភ្នំពេញ ប្រាប់អោយដឹងថា លោក សេង សុវណ្ណារ៉ា ត្រូវបាននាយកដ្ឋានសន្តិសុខផ្ទៃក្នុង នៃអគ្គស្នងការដ្ឋាននគរបាលជាតិ ឃាត់ខ្លួននៅរសៀលនេះ នៅពេលចូលទៅបំភ្លឺ ករណីរំលោភលើដីសាធារណៈរបស់រដ្ឋប្រមាណ១ពាន់ហិកតា នៅខេត្តមណ្ឌលគិរី ។
ពេលនេះលោក សេង សុវណ្ណារ៉ា កំពុងស្ថិតនៅដំណាក់កាលស៊ើបសួររបស់ស្ថាប័នអយ្យការ ដែលរឿងរ៉ាវលម្អិតយ៉ាងណានោះនឹងផ្សាយជូនជាបន្ត ។
សូមជម្រាបថា កន្លងមកលោក សេង សុវណ្ណារ៉ា ជាអនុរដ្ឋលេខាធិការក្រសួងយុត្តិធម៌ និងជាក្រុមការងារថ្នាក់ជាតិ ចុះជួយខេត្តមណ្ឌលគិរី បានកើតមានឡើងបន្តបន្ទាប់ ពាក់ព័ន្ធការរំលោភយកដីរដ្ឋប្រមាណ១ពាន់ហិកតា ស្ថិតនៅភូមិអន្ត្រេះ ឃុំអរបួនលើ ស្រុកកោះញែក ខេត្តមណ្ឌលគិរី ៕