រាជធានីភ្នំពេញ ៖ កាលពីវេលាម៉ោង៦ព្រឹក ថ្ងៃទី២៦ ខែមិថុនា ឆ្នាំ២០២០ នេះសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានចេញសារលិខិតជូនមហាជនរួមជាតិទូទាំងប្រទេសនាឱកាសប្រារព្ធទិវាអន្តរជាតិប្រយុទ្ធប្រឆាំងគ្រឿងញៀន ។
ខ្លឹមសារលិខិតរបស់សម្តេចតេជោ ហ៊ុន សែន បានថ្លែងប្រាប់ទៅកាន់ស្ថាប័នធំៗសំខាន់ដូចជា អាជ្ញាធរជាតិប្រយុទ្ធប្រឆាំងគ្រឿងញៀន គណៈបញ្ជាការយុទ្ធនាការប្រយុទ្ធប្រឆាំងគ្រឿងញៀនខុសច្បាប់ និងគណៈកម្មាធិការត្រួតពិនិត្យគ្រឿងញៀនរាជធានី-ខេត្តទាំងអស់ ត្រូវបន្ត និងបង្កើនសកម្មភាពប្រយុទ្ធប្រឆាំងគ្រឿងញៀនឲ្យកាន់តែខ្លាំងក្លាថែមទៀត ។
សម្តេចនាយករដ្ឋមន្ត្រីក៏បានណែនាំឲ្យស្ថាប័នមានសមត្ថកិច្ចទាំងនោះបន្តពង្រឹងការអនុវត្ត «ផែនការភូមិ ស គ្មានគ្រឿងញៀន» ដើម្បីធ្វើជាមូលដ្ឋានក្នុងការស្រាវជ្រាវ និងការប្រមូលព័ត៌មាន ដែលអាចឈានទៅដល់ការទប់ស្កាត់និងការបង្ក្រាបបទល្មើសគ្រឿងញៀនទាន់ពេលវេលា និងមានប្រសិទ្ធភាព ហើយអាចឈានទៅដល់ការលុបបំបាត់ការជួញដូរនិងការប្រើប្រាស់គ្រឿងញៀននៅក្នុងផ្ទៃប្រទេស ៕