ទីបំផុតក្រុមហង្សក្រហម Liverpool បានចារឈ្មោះនៅលើពានរង្វាន់លីគកំពូល English Premier League កាលពីថ្ងៃព្រហស្បតិ៍បន្ទាប់ពីក្រុមមេឃខៀវ Manchester City បានចាញ់ក្រុមតោខៀវ Chelsea ដោយលទ្ធផល ២-១ នៅកីឡដ្ឋាន Stamford Bridge ក្រោយពីខកខានអស់រយៈពេល៣០ឆ្នាំចាប់តាំងពីឆ្នាំ១៩៩០មក ។ នេះបើយោងតាមប្រភពពីទីភ្នាក់ងារសារព័ត៌មាន Goal ដែលបានចេញផ្សាយ ។
តាមរយៈព័ត៌មានពីគេហទំព័រ Goal បានចេញផ្សាយថា ម្ចាស់ជើងឯកលីគកំពូងអង់គ្លេសរដូវកាលនេះ (Liverpool) ទទួលបានប្រាក់រង្វាន់ជាទឹកប្រមាណ១៨២លានដុល្លារ បន្ថែមពីលើមេដាយមាសចំនួន៤៥គ្រឿង និងពាន English Premier League ប្រចាំព្រឹត្តិការណ៍១ទៀត បន្ទាប់ពីចំណាយពេលប្រកួតជិត៩ខែ វិលជុំសន្សំពិន្ទុចាប់ពីខែសីហាដល់ខែឧសភាជារឿងរាល់ឆ្នាំ ។
ទឹកប្រាក់ទាំងនេះប្រមូលបានមកពីប្រព័ន្ធផ្សព្វផ្សាយ – TV money និងពីបណ្តាញទូរទស្សន៍នានាដែលបានចូលរួមទិញសិទ្ធិផ្ទាល់ និងបន្តផ្ទាល់ទៅកាន់ពិភពលោក ដែលត្រូវយកចែកជូនទៅតាមចំណាត់ថ្នាក់ចុងក្រោយនៃក្លិបនីមួយៗ បន្ទាប់ពីបិទរដូវកាលទាំងស្រុង ។ សូមបញ្ជាក់ផងដែរថា ចំនួនទឹកប្រាក់ខាងលើនេះ មិនរាប់បញ្ចូលថ្លៃលក់សំបុត្រប្រចាំសប្តាហ៍ និងដៃគូសហប្រតិបត្តិការរវាងក្លិបនោះឡើយ ៕