រាជធានីភ្នំពេញ ៖ លោក តាំង គីមសួរ ដែលជាបុគ្គលមួយរូបតែងតែឈឺឆ្អាលចំពោះបញ្ហាសង្គម ហើយក៏ជាអ្នកដែលស្រលាញ់ធម្មជាតិក៏ដូចជាព្រៃឈើ និងចូលចិត្តធ្វើដំណើរបែបផ្សងព្រេងបោះតង់តាមព្រៃភ្នំជាដើម នៅវេលាម៉ោង២និង២៣នាទីរសៀល ថ្ងៃទី២៦ ខែមិថុនា ឆ្នាំ២០២០ នេះលោកបានបង្ហោះរូបភាពមួយសន្លឹង រួមជាមួយសំណេរថា លោកយកជីវិតមកដាក់ ប្រកាសធ្វើសង្គ្រាមជាមួយឈ្មួញឈើ និងមន្ត្រីឃុបឃិតបទល្មើសព្រៃឈើ ។
តាមប្រភពពីហ្វេសប៊ុកផេកផ្លូវការរបស់លោក តាំង គីមសួរ បានឲ្យដឹងថា «ខ្ញុំយកជីវិតរបស់ខ្ញុំមកដាក់ ខ្ញុំសូមប្រកាសធ្វើសង្គ្រាមជាមួយឈ្មួញឈើ និងមន្ត្រីពាក់ព័ន្ធដែលមានការឃុបឃិតជាមួយបទល្មើសព្រៃឈើនៅតំបន់ឳរ៉ាល់ចាប់ពីពេលនេះទៅ✋✋✋ តើមានអ្នកណាអាចចូលរួមក្នុងយុទ្ធនាការនេះជាមួយគ្នាទេ?» ។
ក្រោយពីលោកបានបង្ហោះរូបភាពជាមួយសំណេរសម្បថបែបនេះរួចមក មហាជនដែលប្រើប្រាស់បណ្តាញសង្គមជាច្រើនមានការពេញចិត្ត និងចែករំលែកបន្តក៏ដូចជាចូលរួមជាមតិយោបល់ (Comment) គាំទ្រក្នុងការប្រឆាំងការកាប់បំផ្លាញព្រៃឈើដោយខុសច្បាប់ និងមន្ត្រីខិលខូចមួយចំនួនដែលឃុបឃិតគ្នាប្រព្រឹត្តបទល្មើសព្រៃឈើដែលជាសម្បត្តិធម្មជាតិនៅតំបន់ឱរ៉ាល់ និងតំបន់ដទៃទៀតផងដែរ ៕