ទីក្រុងប៉េកាំង ៖ យោងតាមទីភ្នាក់ងារសារព័ត៌មាន រ៉យទ័រ បានឱ្យដឹងថា ក្រោយពីបានស៊ើបអង្កេតរករោគរាតត្បាតនៅមជ្ឈមណ្ឌលអាហារបោះដុំ Xinfadi ជាកន្លែងផ្ទុកទំនិញ និងឃ្លាំងស្តុកទំនិញធំៗជាច្រើនបានបង្ហាញថា អ្នកដែលឧស្សាហ៍ទៅទិញគ្រឿងសមុទ្រងាយឆ្លងវីរុសកូវីដ១៩បំផុតនៅទីនោះ និងថ្មីៗនេះបានរកឃើញតូបលក់សាច់គោ និងតូបលក់សាច់ចៀម ជាកន្លែងជាប់ចំណាត់ថ្នាក់លេខ២សម្រាប់ចម្លងកូវីដ១៩ ។
លោក Wu Zunyou ជាប្រធានមជ្ឈមណ្ឌលស្រាវជ្រាវ និងបង្ការជំងឺឆ្លងរាតត្បាត នៃមជ្ឈមណ្ឌលចិនសម្រាប់ការបង្ការ និងគ្រប់គ្រងជំងឺ បាននិយាយថា ក្នុងសន្និសីទសារព័ត៌មានកាលពីថ្ងៃទី១៨ មិថុនា ថា ៖«យើងបានវិភាគពីសកម្មភាពរបស់អ្នកដែលឆ្លងមេរោគ ។ យើងបានរកឃើញថា មនុស្សដែលទៅទិញអាហារសមុទ្រងាយឆ្លងវីរុសកូវីដ១៩ច្រើនជាងអ្នកដទៃទៀត ។ យើងបានយកសំណាកគំរូជាច្រើនពីផ្សារដើម្បីធ្វើតេស្ត ។ បន្ទាប់ពីធ្វើការវិភាគលទ្ធផលយើងបានរកឃើញថា កន្លែងដែលមានមេរោគច្រើនជាងគេគឺសាលដែលមានផលិតផលអាហារសមុទ្រ» ។
ចំណែកឯសាច់សត្វដែលបានតាំងលក់នៅក្នុងសាលជាមួយគ្នានឹងផ្នែកលក់អាហារសមុទ្រដែលមានដូចជា តូបលក់សាច់គោ និងតូបលក់សាច់ចៀម ជាប់ចំណាត់ថ្នាក់លេខ២ដែលជាកន្លែងងាយឆ្លងកូវីដ១៩ ។ អ្នកជំនាញផ្នែកជំងឺរាតត្បាតរបស់ចិនបាននិយាយថា ថ្មីត្បិតតែកន្លែងលក់ទាំងនោះស្ថិតក្នុងសីតុណ្ហភាពទាបក្តី ប៉ុន្តែមិនអាចធ្វើឲ្យមេរោគរាតត្បាតមួយនេះរលាយបានឡើយ ។
លោក Wu Zunyou បានបកស្រាយថា ៖«កាលនោះយើងសង្ស័យថា ការផ្ទុះឡើងនៃជំងឺកូវីដនៅក្នុងផ្សារអាហារសមុទ្រ វូហាន គឺទាក់ទងទៅនឹងសត្វ ។ លទ្ធផលនៃការស៊ើបអង្កេតរបស់យើងនៅក្នុងផ្សារប៉េកាំងបាននាំយើងត្រឡប់ទៅ វូហាន វិញ និងផ្តល់ទិសថ្មីមួយសម្រាប់ការដោះស្រាយចម្ងល់នៃការផ្ទុះមេរោគនៅ វូហាន »។
ប្រទេសចិនបានបញ្ឈប់ការនាំចូល ត្រីសាល់ម៉ុង ពីអឺរ៉ុបនៅសប្តាហ៍នេះបន្ទាប់ពីមានករណីថ្មីនៃកូវីដ១៩ចំនួនជាង ១០០ ករណីត្រូវបានគេរាយការណ៍ថារកឃើញនៅក្នុងទីក្រុងប៉េកាំង ។ អ្នកឆ្លងមេរោគភាគច្រើនគឺជាប់ទាក់ទងនឹងផ្សារ Xinfadi ដែលជំរុញឱ្យមានការឆ្លើយតបពីរដ្ឋាភិបាលដើម្បីបញ្ឈប់ការនាំចូលត្រីសាល់ម៉ុងជាបន្ទាន់ ៕
អត្ថបទ ៖ សំណាង
