រាជធានីភ្នំពេញ ៖ តារាចម្រៀងជើងចាស់អ្នកនាង ម៉េង កែវពេជ្ជតា កាលពីថ្ងៃទី១០ ខែឧសភា ឆ្នាំ២០២០ កន្លងទៅនេះបានធ្វើការឡាយបន្តផ្ទាល់នៅលើបណ្តាញសង្គមហ្វេសប៊ុកធ្វើឱ្យមហាជនមានការភ្ញាក់ផ្អើលយ៉ាងខ្លាំង កន្លងផុតមិនទាន់បានប៉ុន្មានផងពេលអ្នកតារាស្រីជើងចាស់រូបនេះត្រូវបាននារីម្នាក់ប្តឹងពីបទបរិហារកេរ្តិ៍ និងសម្លុតកុំឱ្យដាក់ពាក្យបណ្តឹង ។
តាមប្រភពពាក្យបណ្តឹងដែលប្តឹងទៅកាន់ព្រះរាជអាជ្ញានៃអយ្យការអមសាលាដំបូងរាជធានីភ្នំពេញនោះ អ្នកដែលដាក់ពាក្យបណ្តឹងមានឈ្មោះ រស់ សោភ័ណ្ឌ ភេទស្រី អាយុ២៨ឆ្នាំ មានអាសយដ្ឋានផ្ទះលេខ ៨៣៨ ផ្លូវលំ៧៧BT ស្ថិតក្នុងភូមិចំរើនផល២ សង្កាត់បឹងទំពន់១ ខណ្ឌមានជ័យ រាជធានីភ្នំពេញ ។
តាមប្រភពពាក្យបណ្តឹង អ្នកនាង ម៉េង កែវពេជ្ជតា ត្រូវនារីខាងលើប្តឹងពីបទ «បរិហារកេរ្តិ៍ជាសាធារណៈ និងសម្លុតកុំឱ្យដាក់ពាក្យបណ្តឹង» ដែលប្រព្រឹត្តនៅរាជធានីភ្នំពេញកាលពីថ្ងៃទី១០ ខែឧសភា ឆ្នាំ២០២០ រហូតដល់បច្ចុប្បន្ន ។ ជុំវិញករណីនេះដែរអ្នកនាងម៉េង កែវពេជ្ជតា នៅមិនទាន់មានការឆ្លើយតបណាមួយនៅឡើយនោះទេ ៕
អត្ថបទដោយ ៖ សំណាង
