ប្រទេសប្រេស៊ីលបានវ៉ាដាច់សហរដ្ឋអាមេរិកក្នុងនាមជាប្រទេសដែលមានចំនួនអ្នកស្លាប់ដោយសារជំងឺរាតត្បាតកូវីដ១៩ច្រើនបំផុតក្នុង១ថ្ងៃ ។ នេះបើតាមប្រភពពីទីភ្នាក់ងារសារព័ត៌មាន ស៊ីនហួរ បានចេញផ្សាយកាលពីថ្ងៃទី២៦ ខែឧសភា ឆ្នាំ២០២០ ។
ប្រទេសប្រេស៊ីលកាលពីថ្ងៃចន្ទមានចំនួនអ្នកស្លាប់ដោយសារវីរុសថ្មីនេះបានកើនឡើងសរុបដល់ ២៣៤៧៣ នាក់ បន្ទាប់ពីមានអ្នកស្លាប់ចំនួន ៨០៧ នាក់ក្នុងមួយថ្ងៃ ។ ស្របពេលជាមួយគ្នានេះដែរចំនួនអ្នកស្លាប់ដោយសារកូវីដ១៩ នៅសហរដ្ឋអាមេរិកបានធ្លាក់ចុះមកត្រឹម៦៤៦នាក់ក្នុងមួយថ្ងៃ ដែលសហរដ្ឋអាមេរិកមានចំនួនអ្នកឆ្លងសរុបដល់ទៅ ១.៦៦២.៧៦៨ នាក់ និងមានអ្នកស្លាប់ជិត ១០០.០០០ នាក់គិតត្រឹមថ្ងៃចន្ទ ។
សម្រាប់ប្រទេសប្រេស៊ីលចំនួនប្រជាជនសរុបដែលបានធ្វើតេស្ត៍វិជ្ជមានសម្រាប់ជំងឺនេះបានឈានដល់ ៣៧៤.៨៩៨ នាក់ដែលមានអត្រាមរណភាព ៦,៣ ភាគរយនេះបើយោងតាមក្រសួងសុខាភិបាលប្រេស៊ីល។ ក្នុងរយៈពេល ២៤ ម៉ោងកន្លងមកមានករណីឆ្លងថ្មីចំនួន ១១.៦៨៧ នាក់ត្រូវបានគេរកឃើញខណៈដែលមនុស្សសរុបចំនួន ១៥៣.៨៣៣ នាក់បានជាសះស្បើយចាប់តាំងពីការរាតត្បាតរាលដាលដល់ប្រេស៊ីល ៕
ប្រភព ៖ Xinhua
