រាជធានីភ្នំពេញ ៖ បុរសញៀនថ្នាំចំនួន២នាក់ ត្រូវបានសមត្ថកិច្ចនគរបាលខណ្ឌសែនសុខ ចាប់ខ្លួនតាមបណ្តឹងរបស់ជនរងគ្រោះ ពាក់ព័ន្ធលួចដោះយកស្លាកលេខរថយន្ត កាលពីថ្ងៃទី២១ ខែឧសភា ឆ្នាំ២០២០ ។
ជនសង្ស័យទាំង២នាក់ មានឈ្មោះទី១ ធូ សុភក្ត្រ័ ភេទប្រុស អាយុ៣៧ឆ្នាំ ជនជាតិខ្មែរ មុខរបរគ្មាន ស្នាក់នៅក្នុងខណ្ឌពោធិ៍សែនជ័យ និងទី២ ឈ្មោះ ឃិន ខុំ ភេទប្រុស អាយុ៣៧ឆ្នាំ ជនជាតិខ្មែរ មុខរបរគ្មាន (មានសារធាតុញៀនក្នុងខ្លួនទាំង២នាក់) ។ ចំណែកឯជនរងគ្រោះ មានឈ្មោះ ងន តុងអាន ភេទប្រុស អាយុ៣៨ឆ្នាំ ជនជាតិខ្មែរ មុខរបរលក់ដូរ ស្នាក់នៅបន្ទប់ផ្ទះជួល ក្នុងសង្កាត់ភ្នំពេញថ្មី ។
ជនរងគ្រោះ បានអោយដឹងថា កាលពីវេលាម៉ោង១យប់ មានក្រុមចោរមកលួចដោះយកស្លាកលេខរថយន្តរបស់គាត់ ១គ្រឿង (០១គូ មុខនិងក្រោយ) ។ លុះនៅវេលាម៉ោង១១និង៣០នាទីយប់ថ្ងៃទី២១ ខែឧសភានេះ គាត់បានប្រទះឃើញចោរ២នាក់ បានមកលួចដោះយកស្លាកលេខរថយន្តរបស់គាត់១គ្រឿងទៀត ទើបគាត់ប្តឹងឲ្យសមត្ថកិច្ចមូលដ្ឋានមកស្ទាក់ចាប់ខ្លួនតែម្តង ។
ជនសង្ស័យ បានសារភាពនូវទង្វើខុសច្បាប់របស់ខ្លួនថា ពិតជាបានលួចដោះយកស្លាកលេខឡានរបស់ជនរងគ្រោះពិតមែន ដើម្បីយកទៅលក់ឲ្យគេបន្ត ក្នុងតម្លៃរាប់រយដុល្លារ ។
ជនសង្ស័យទាំង២នាក់ ក្រៅពីមានទោសពីបទលួចទ្រព្យសម្បត្តិគេ គឺនៅមានទោសមួយករណីទៀត គឺប្រើប្រាស់គ្រឿងញៀនខុសច្បាប់ ៕