ភ្នំពេញ៖ រាជរដ្ឋាភិបាលសម្រេចដាក់ឲ្យអនុវត្តផែនការអនុគ្រោះ និងលើកទឹកចិត្តចំពោះការប្រើប្រាស់អគ្គិសនីរបស់វិស័យឧស្សាហកម្ម កសិកម្ម ពាណិជ្ជកម្ម និងសេវាកម្ម ចាប់ពីខែមិថុនា ដល់ខែតុលា ឆ្នាំ២០២០។
សេចក្តីប្រកាសរបស់ក្រសួងរ៉ែ និងថាមពល ចុះថ្ងៃទី១៥ ខែឧសភា ឆ្នាំ២០២០ ដែលទើបនឹងផ្សព្វផ្សាយនៅថ្ងៃទី២០ ខែឧសភា ឆ្នាំ២០២០ នេះ បានឲ្យដឹងថា ផែនការអនុគ្រោះ និងលើកទឹកចិត្តចំពោះការប្រើប្រាស់អគ្គិសនី របស់វិស័យឧស្សាហកម្ម កសិកម្ម ពាណិជ្ជកម្ម និងសេវាកម្ម បានបន្ថយថ្លៃអគ្គិសនីចំនួន២៥ភាគរយ លើការបង់ថ្លៃអគ្គិសនីដែលប្រើប្រាស់លើសពីចំនួនប្រើប្រាស់ប្រចាំខែមធ្យមក្នុងរយៈពេល ៣ខែដើមឆ្នាំ (ពីខែ មករា ដល់ខែមីនា)។
ផែនការអនុគ្រោះ និងលើកទឹកចិត្តនេះ ជាការជួយលើកទឹកចិត្តចំពោះការប្រើប្រាស់អគ្គិសនីរបស់ទីតាំង ដែលមានបរិយាកាសអំណោយផល អាចបង្កើតសកម្មភាពផលិតកម្ម ឬអាជីវកម្ម ក្នុងរយៈពេលអនុវត្តការណែនាំរបស់រាជរដ្ឋាភិបាលកម្ពុជា ក្នុងការទប់ស្កាត់ការចម្លងមេរោគ Covid-19 ៕
