ខេត្តរតនគិរី÷ នៅព្រឹកថ្ងៃទី១៩ ខែឧសភាឆ្នាំ២០២០ មន្ទីរសាធារណ:ការ និងដឹកជញ្ជូនខេត្តរតនគិរី សហការជាមួយនិងនគរបាលចរាចរណ៍ផ្លូវគោកខេត្ត បានចុះធ្វើយុទ្ធនាការអប់រំផ្សព្វផ្សាយ ស្តីពីសុវត្ថិភាពចរាចរណ៍ផ្លូវគោក និងចែកមួកសុវត្ថិភាព ដល់បងប្អូនប្រជាពលរដ្ឋ ដើម្បីពញ្ញាក់ស្មារតី ដល់បងប្អូនប្រជាពលរដ្ឋ ដែលជាអ្នកប្រើប្រាស់ផ្លូវទាំងអស់ឲ្យចូលរួមគោរពច្បាប់ចរាចរណ៍ទាំងអស់គ្នា។
ពិធីនេះបានប្រព្រឹត្តធ្វើឡើងនៅទីរួមស្រុកវើនសៃ ខេត្តរតនគិរី។
លោក ផា ថា ប្រធានការិយាល័យសុវត្ថិភាពចរាចរណ៍ផ្លូវគោកនៃមន្ទីរសាធារណ:ការនិងដឹកជញ្ជូនខេត្តបានឲ្យដឹងថា យុទ្ធនាការនេះធ្វើឡើងក្នុងគោលបំណងអប់រំផ្សព្វផ្សាយណែនាំដល់អ្នកបើកបរយានយន្តគ្រប់ប្រភេទឲ្យចូលរួមគោរពច្បាប់ចរាចរណ៍ផ្លូវគោកទាំង អស់គ្នាជាពិសេសពេលបើកបរត្រូវមានការប្រុងប្រយ័ត្នខ្ពស់ មិនត្រូវបើកបរក្រោមឥទ្ធិពលគ្រឿងស្រវឹងជាដាច់ខាត ត្រូវចេះគោរពសិទ្ធិ អាទិភាព និងមានការអធ្យាស្រ័យគ្នាទៅវិញទៅមក។
រាល់ពេលបើកបរធ្វើយ៉ាងណាចូលរួមទប់ស្កាត់និងកាត់បន្ថយគ្រោះថ្នាក់ចរាចរណ៍ដែលកំពុងកើតមានឡើងជារៀងរាល់ថ្ងៃគួរឲ្យព្រួយបារម្ភ។
លោកបានបន្ដថា ក្នុងយុទ្ធនាការនេះមានការរៀបចំជាសំណួរចម្លើយ ដើម្បីឲ្យអ្នកចូលរួមបានយល់ដឹងច្បាស់អំពីមូលហេតុដែលធ្វើឲ្យមានចំនួនអ្នកស្លាប់ជាច្រើនដោយគ្រោះថ្នាក់ចរាចរណ៍ប្រចាំថ្ងៃនៅទូទាំងប្រទេស និងមូលហេតុការស្លាប់របស់អ្នកទាំងនោះផងដែរ។
ហើយតាមរយៈចំណេះដឹងបន្ថែមពីយុទ្ធនាការនេះដែរ លោកជឿជាក់ថា បងប្អូននិងបន្ថែមការការពារ និងប្រុងប្រយ័ត្ននៅពេលបើកបរ និងចូលរួមផ្សព្វផ្សាយបន្តដល់អ្នកដទៃទៀតឲ្យបានយល់ដឹងកាន់តែច្បាស់អំពីបញ្ហាគ្រោះថ្នាក់ទាំងអស់នេះ។
គួរបញ្ជាក់ផងដែរថា ក្នុងយុទ្ធនាការនេះផងដែរ បានប្រើប្រាស់សម្ភារៈ និងឯកសារមួយចំនួនដូចជា៖
-មួកសុវត្ថិភាពចំនួន៥០មួក
-សៀវភៅច្បាប់ស្តីពីចរាចរណ៍ផ្លូវគោក១២០ ក្បាល
-សៀវភៅអ្វីដែលអ្នកបើកបរទោចក្រយានយន្តគួរយល់ដឹង១២០ក្បាល
-ខិតបណ្ណជំនួយស្មារតី ស្តីពីសុវត្ថិភាពចរាចរណ៍ផ្លូវគោក១២០សន្លឹក
-ស្ទីកឃ័រចំណាំងផ្លាត១២០សន្លឹក
-ស្ទីកឃ័រ “ថ្ងៃនេះថ្ងៃស្អែកកុំឲ្យមានគ្រោះថ្នាក់ចរាចរណ៍” ១២០សន្លឹក៕
