យោងតាមប្រភព AF បានឱ្យដឹងថា សម្រាប់វិស័យបាល់ទាត់ផ្នែកបុរសដែលមានអាយុកាលជិត២០០ឆ្នាំគិតចាប់តាំងពីបានបង្កើតឡើងដំបូងកាលពីឆ្នាំ១៨៤០រហូតមកដល់បច្ចុប្បន្នបានបន្សល់ទុកនូវកំណត់ត្រាអស្ចារ្យចំនួន៥ដែលនៅមិនទាន់មានកីឡាករ និងក្លឹបធំៗណាបំបែកបាននៅឡើយនោះទេ ។
កំណត់ត្រាទី១- ក្លឹបឈ្នះពាន Champions League ៥សម័យកាលជាប់គ្នា
Real Madrid គឺជាក្លឹបយក្សមួយដែលបានឈ្នះពានរង្វាន់អឺរ៉ុប UEFA Champions League ចំនួន៥សម័យកាលជាប់គ្នាកាលពីឆ្នាំ១៩៥៦ដល់ឆ្នាំ១៩៦០ តាំងពីជំនាន់ពាន Champion League ត្រូវបានគេហៅថាពាន European Cup រហូតមកដល់បច្ចុប្បន្ននៅមិនទាន់មានក្លឹបយក្សណាអាចបំបែកកំណត់ត្រាអស្ចារ្យរបស់ Real Madrid មួយនេះនៅឡើយនោះទេ ។
កំណត់ត្រាទី២ – គ្រាប់បាល់ច្រើនបំផុតនៅ World Cup
កាលពីឆ្នាំ១៩៥៨ ដែលជារាជកាលរបស់វីរបុរសក្រុមសាំបាប្រេស៊ីលលោក Pele ជួយប្រេស៊ីលលើកពាន World Cup ជាលើកដំបូង មានអតីតកីឡាជើងចាស់ម្នាក់គឺលោក Juse Fontaine បានបង្កើតកំណត់ត្រាការរកគ្រាប់បាល់ច្រើនបំផុតត្រឹមតែ៦ប្រកួតប៉ុណ្ណោះរកបានដល់ទៅ១៣គ្រាប់ ។ កំណត់ត្រាស៊ុតបញ្ជូលទីនេះនៅមិនទាន់ឃើញមានកីឡាករណាអាចបំបែកបាននៅឡើយនោះទេសូម្បីតែ Ronaldo Nazario របស់ប្រេស៊ីលក៏មិនអាចបំបែកបានដោយរកបានត្រឹមតែ៨គ្រាប់ប៉ុណ្ណោះកាលឆ្នាំ ២០០២ ។
កំណត់ត្រាទី៣- គ្រូបង្វឹកដែលឈ្នះពានច្រើនបំផុត
អ្នកដែលកាន់កំណត់ត្រាដ៏អស្ចារ្យមួយនេះគឺគ្រូតា Sir Alex Ferguson ដែលលោកអាចធ្វើបានកាលសម័យកាលដឹកនាំនៅ Man Utd និងក្លឹបចាស់ផ្សេងទៀត ធ្វើឱ្យគ្រូតា Sir Alex Ferguson បានឈ្នះបានដល់ទៅ៤៨ពានឯណោះ ។
កំណត់ត្រាទី៤- អ្នកចូលទស្សនានៅកីឡដ្ឋានច្រើនបំផុត
កាលពី World Cup វគ្គផ្តាច់ព្រ័ត្រឆ្នាំ១៩៥០ នៅឯកីឡដ្ឋាន Maracana Stadium ក្នុងការប្រកួតរវាងប្រេស៊ីល និងអ៊ុយរុយហ្គាយមានអ្នកទស្សនាសរុបប្រមាណជាង ២២០០០០ នាក់ឯណោះ ។
កំណត់ត្រាទី៥- គ្រាប់បាល់ច្រើនបំផុតក្នុងមួយឆ្នាំ
តារាឆ្នើមខ្សែប្រយុទ្ធប្រចាំក្រុមជម្រើសជាតិពពក.កអាហ្សង់ទីន និងក្លឹបអ្នកមានបុណ្យ FC Barcelona កីឡាករ Lionel Messi កាលពីឆ្នាំ ២០១២ បានបង្កើតកំណត់ត្រាអស្ចារ្យមួយដោយរកគ្រាប់បាល់ក្នុង១ឆ្នាំបានដល់ទៅ៩១គ្រាប់ដែលបូកទាំងការលេងឱ្យក្លឹប Barcelona និងនៅជម្រើសជាតិអាហ្សង់ទីន ។ ដោយវាជាកំណត់ត្រាយកឈ្នះលើអ្នកកំណត់ត្រាចាស់របស់លោក Gerd Muller ធ្វើបាន ៨៥ គ្រាប់៕
