រាជធានីភ្នំពេញ ៖ អង្គភាពប្រឆាំងអំពើពុករលួយ បានបញ្ជូនខ្លួនលោកម៉ៃ តុលា អតីតអគ្គលេខាធិការរងសហព័ន្ធកីឡាបាល់ទាត់កម្ពុជា ទៅកាន់សាលាដំបូងរាជធានីភ្នំពេញ កាលពីរសៀលថ្ងៃទី៨ ខែឧសភា ឆ្នាំ២០២០ ។
ការបញ្ជូនទៅតុលាការនេះ គឺបន្ទាប់ពីអង្គភាពប្រឆាំងអំពើពុករលួយ បានស្តាប់ចម្លើយលោក ម៉ៃ តុលា ចប់សព្វគ្រប់ពាក់នឹងការប្រព្រឹត្តអំពើពុករលួយកិបកេងថវិកាសហព័ន្ធកីឡាបាល់ទាត់កម្ពុជា ។
លោកគុជ គឹមឡុង អ្នកនាំពាក្យសាលាដំបូងរាជធានីភ្នំពេញ បានប្រាប់អ្នកសារព័ត៌មានថា អង្គភាពប្រឆាំងអំពើពុករលួយ បានបញ្ជូនខ្លួនលោក ម៉ៃ តុលា មកសាលាដំបូងរាជធានីភ្នំពេញ កាលពីរសៀលថ្ងៃទី៨ ខែឧសភានេះ ហើយព្រះរាជអាជ្ញាកំពុងតែធ្វើការសាកសួរ ។
លោកម៉ៃ តុលា អតីតអគ្គលេខាធិការរងសហព័ន្ធកីឡាបាល់ទាត់កម្ពុជា ត្រូវបានកម្លាំងប៉េអឹមលើផ្ទៃប្រទេសចាប់ខ្លួនកាលពីថ្ងៃទី៧ ខែឧសភា ឆ្នាំ២០២០ ។ បន្ទាប់ពីសាកសួរយកចម្លើយរួច ប៉េអឹមបានបញ្ជូនខ្លួនលោកម៉ៃ តុលា ទៅឲ្យអង្គភាពប្រឆាំងអំពើពុករលួយ ដើម្បីបន្តនីតិវិធីតាមផ្លូវច្បាប់ ៕