កីឡា ៖ គណៈកម្មាធិការជាតិអូឡាំពិកកម្ពុជា គ្រោងនឹងបញ្ជូនកីឡាករ-កីឡាការិនី ជាង១០០នាក់ មកពីសហព័ន្ធកីឡាជាតិចំនួន១២ ទៅហ្វឹកហាត់នៅប្រទេសចិន ដើម្បីសម្រួចសមត្ថភាពដល់កីឡាករ ត្រៀមប្រជែងមេដាយក្នុងព្រឹត្តិការណ៍ SEA GAMES 2023 ។
ឯកឧត្ដម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានមានប្រសាសន៍ថ្មីៗនេះថា ដោយការចង្អុលបង្ហាញរបស់សម្ដេចពិជ័យសេនា ទៀ បាញ់ ប្រធានគណៈកម្មាធិការជាតិរៀបចំការប្រកួតកីឡាស៊ីហ្គេម ២០២៣ បានណែនាំឲ្យយកចិត្តទុកដាក់លើការពង្រឹងសមត្ថភាពកីឡាករកីឡាការិនី ហើយយើងក៏បានធ្វើទំនាក់ទំនងជាមួយប្រទេសចិន ដើម្បីទៅហ្វឹកហាត់នៅទីនោះ ។
អគ្គលេខាធិការ បានបន្តថា ប្រសិនបើមិនមានអ្វីប្រែប្រួលនោះទេ កីឡាករ-កីឡាការិនី អាចនឹងចេញទៅហ្វឹកហាត់ នៅប្រទេសចិននាថ្ងៃទី២២ ខែវិច្ឆិកា ឆ្នាំ២០២០ ខាងមុខនេះ ។ ប៉ុន្តែបើ នៅមានបញ្ហាទាក់ទងនឹងមេរោគកូវីដ១៩ នឹងអាចលើកទៅខែមីនា ឆ្នាំ២០២១វិញ ដើម្បីត្រៀមចូលរួមការប្រកួតកីឡា ស៊ីហ្គេម លើកទី៣១ ឆ្នាំ២០២១ នៅប្រទេសវៀតណាម និង ស៊ីហ្គេម លើកទី៣២ ឆ្នាំ២០២៣ ដែលកម្ពុជាទទួលធ្វើជាម្ចាស់ផ្ទះ ។
ឯកឧត្ដម វ៉ាត់ ចំរើន បានបញ្ជាក់ថា ពេលចេញទៅដល់ប្រទេសចិន គេនឹងរៀបចំឲ្យកីឡាករទាំងអស់នៅដាច់ដោយឡែក១៤ថ្ងៃ ៕
