រាជធានីភ្នំពេញ ៖ រថយន្តកូរ៉េ១គ្រឿង ដឹកស៊ីម៉ង់លើសទម្ងន់ បើកឡើងស្ពានអាកាសមិនរួច រលត់ម៉ាស៊ីន រអិលថយក្រោយចុះពីលើស្ពាន បុកបង្កាន់ដៃស្ពាន សំណាងល្អ មិនបង្កអោយមានអ្នករងរបួសឡើយ ។
ហេតុការណ៍នេះកើតឡើងកាលពីវេលាម៉ោង១០និង៤០នាទី ព្រឹកថ្ងៃទី២៨ មេសា ២០២០ នៅចំណុចលើស្ពានអាកាស៧មករា តាមបណ្ដោយមហាវិថីសហព័ន្ធរុស្សី សង្កាត់ទឹកល្អក់ទី១ ខណ្ឌទួលគោក រាជធានីភ្នំពេញ ។
បើតាមម្ចាស់រថយន្តដែលជាអ្នកបើកបរដឹកស៊ីម៉ង់ បានប្រាប់ឲ្យដឹងថា នៅមុនពេលកើតហេតុ រូបលោកបានបើករថយន្តកូរ៉េ ពណ៌ស ពាក់ស្លាកលេខ កំពត 3A-0233 តាមបណ្ដោយមហាវិថីសហព័ន្ធរុស្សី ក្នុងទិសដៅពីកើតទៅលិច គោលបំណងឡើងស្ពានអាកាស៧មករា ខណៈឡើងស្ពានបានបន្តិច រថយន្តក៏រលត់ម៉ាស៊ីន ជាន់ហ្វ្រាំងក៏លែងស៊ី ហើយរថយន្តថយក្រោយចុះពីលើស្ពានវិញ ពេលនោះ រូបលោកសម្រេចចិត្ត បួងចង្កូតរថយន្តបុកបង្កាន់ដៃស្ពានតែម្ដង ជៀសវាងបង្កការបង្កគ្រោះថ្នាក់ដល់អ្នកធ្វើដំណើរដទៃទៀត ។
ក្រោយកើតហេតុ នគរបាលចរាចរណ៍បានមកដល់កន្លែង និងបានទាក់ទងទៅជំនាញ ដើម្បីមកស្ទួនរថយន្ត ទៅរក្សាទុកនៅការិយាល័យចរាចរណ៍ជើងគោកនៃស្នងការដ្ឋាននគរបាលរាជធានីភ្នំពេញ រងចាំដោះស្រាយនៅពេលក្រោយ៕
