រាជធានីភ្នំពេញ ៖ កម្លាំងចម្រុះ បានចុះបង្ក្រាបទីតាំងបើកល្បែងស៊ីសងជល់មាន់ខុសច្បាប់ នៅវេលាម៉ោង១០និង៣០នាទី ថ្ងៃទី០៥ ខែមេសា ឆ្នាំ២០២០ ក្នុងដីឡូត៍គ្មានលេខ ភូមិចំពុះក្អែក១ សង្កាត់ព្រែកថ្មី ដកហូតរថយន្ត៥គ្រឿង និងម៉ូតូ១៨គ្រឿង ។
ការចុះបង្ក្រាបជាក់ស្តែងទីតាំង បើកល្បែងស៊ីសងខុសច្បាប់ (ជល់មាន់)នេះ ដោយមានការអនុញ្ញាតពីលោក សំម ឬទ្ធីវាសនា ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ និងដោយមានបញ្ជាពីលោក ចេង មុនីរ៉ា អភិបាលខណ្ឌ និងជាប្រធានគណៈបញ្ជាការឯកភាពខណ្ឌច្បារអំពៅ កម្លាំងចម្រុះដឹកនាំដោយ លោក រស់ សុភ័ក្ត្រ អភិបាលរងខណ្ឌ, លោក វរសេនីយ៍ទោ ម៉ៅ សឿត អធិការនគរបាលខណ្ឌ, លោក លីវ វណ្ណថេង ចៅសង្កាត់ព្រែកថ្មី និងលោកវរសេនីយ៍ត្រី ម៉ៅ ស៊ីវន នាយប៉ុស្តិ៍ ។
ដកហូតវត្ថុតាងរួមមាន ៖ រថយន្ត០៥គ្រឿង, ម៉ូតូ ១៨គ្រឿង, មាន់ជល់ ០៣ក្បាល (រស់), កៅអីជ័រ ១០០ និងស៊ុម សម្រាប់ក្រុងមាន់ ៥៦ ។ ចំណែកអ្នកមកលេងជល់មាន់ បានរត់គេចខ្លួនបាត់អស់ នៅពេលសមត្ថកិច្ចចុះទៅដល់ ។
សូមបញ្ជាក់ថា វត្ថុតាងខាងលើបានយកមករក្សាទុកនៅអធិការដ្ឋាននគរបាលខណ្ឌ ៕
