យោងតាមការបង្ហោះតាមរយៈហ្វេសប៊ូកផ្លូវការ របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នាល្ងាចថ្ងៃទី៥ ខែមេសា នេះ សម្តេចបានបញ្ជាក់យ៉ាងច្បាស់ថា នឹងមិនឲ្យគ្រូពេទ្យកម្ពុជាណាម្នាក់ ដែលកំពុងព្យាបាលអ្នកជំងឺកូវីដ១៩ ឆ្លងមេរោគ ព្រោះតែខ្វះខាតការទទួលខុសត្រូវ របស់រាជរដ្ឋាភិបាលនោះឡើយ។
នៅក្នុងសាររបស់សម្តេច បានឲ្យដឹងទៀតថា កាលពីម្សិលមិញថ្ងៃទី៤ ខែមេសា ឆ្នាំ២០២០ សម្តេចក្នុងនាមប្រធានគណៈកម្មការជាតិ ប្រយុទ្ធប្រឆាំងនឹងជំងឺកូវីដ១៩ បានបង្ហាញនូវផែនការយុទ្ធសាស្រ្តថ្មីបន្ថែម ក្នុងការប្រយុទ្ធប្រឆាំងនឹងជំងឺឆ្លងកូវីដ១៩ ដែលក្នុងនោះបានបញ្ជាឲ្យបន្ថែមនូវស្តុក ម៉ាសចំនួន១០លានម៉ាស, ខោអាវគ្រូពេទ្យចំនួន៥ពាន់កំប្ល៉េ, ម៉ាសគ្រូពេទ្យ៥០ម៉ឺន, ម៉ាសប្រភេទ N-95 ចំនួន៥ពាន់, និងទឹកអាល់កុលចំនួន១លានលីត្រ។ ក្នុងនោះផងដែរ សម្តេចបានសង្កត់ធ្ងន់ៗថា “នេះជាការចាំបាច់ ព្រោះយើងមិនអាចអោយគ្រូពេទ្យណាម្នាក់ ឆ្លងរោគព្រោះតែខ្វះការទទួលខុសត្រូវរបស់យើងនោះទេ។ ឥឡូវនេះខ្ញុំសូមចេញនូវបទបញ្ជាបន្ថែម គឺយើងត្រូវមានការស្តុកបម្រុងរបស់រាជរដ្ឋាភិបាលមួយកម្រិតថែមទៀត”។
យោងតាមប្រសាសន៍សម្តេចនយករដ្ឋមន្ត្រី ទាំងម៉ាស, ទាំងខោអាវសម្រាប់គ្រូពេទ្យ និងទឹកអាល់កុលនៅពេលប្រើអស់ គឺត្រូវទិញ ឬផលិតយកមកបំពេញបន្ថែមក្នុងស្តុកភ្លាម។ ស្តុករបស់រាជរដ្ឋាភិបាល គឺរក្សានៅក្រសួងសុខាភិបាល ប៉ុន្តែនៅពេលដកយកទៅប្រើប្រាស់ គឺត្រូវដាក់សំណើទៅកាន់ប្រធានគណៈកម្មការជាតិប្រយុទ្ធប្រឆាំងនឹងជំងឺកូវីដ១៩។
សម្តេចតេជោ ហ៊ុន សែន អំពាវនាវសូមឲ្យប្រជាពលរដ្ឋមានទំនុកចិត្ត មកលើវិធានការរាជរដ្ឋាភិបាលក្នុងការទប់ស្កាត់ជំងឺឆ្លងកូវីដ១៩ ដែលក្នុងនោះសម្តេចបញ្ជាក់ថា កម្ពុជាជាប្រទេសក្រមែន តែមិនក្រខាងចិត្តគំនិតនោះទេ យើងចេះគ្រប់គ្រងប្រជាពលរដ្ឋយើង ដែលមកដល់ម៉ោងនេះ មិនមានអ្នកជំងឺណាម្នាក់ទទួលមរណភាពទេ។
ក្នុងនោះផងដែរ សម្តេចក៏បានអរគុណ ចំពោះបងប្អូនប្រជាពលរដ្ឋទូទាំងប្រទេស ដែលបានចូលរួមប្រយុទ្ធប្រឆាំងជំងឺឆ្លងកូវីដ១៩ ជាមួយរាជរដ្ឋាភិបាល៕
