ខេត្តឧត្តរមានជ័យ ៖ ចាប់តាំងពីថ្ងៃទី២២ រហូតដល់ថ្ងៃទី២៦ មីនា ២០២០នេះ អាជ្ញាធរតាមព្រំដែនទូទាំងប្រទេស បានក្ដាប់បានចំនួនប្រជាពលរដ្ឋខ្មែរ បានវិលពីប្រទេសថៃ ចូលដល់ស្រុកកំណើតវិញ មានប្រមាណជាង ៤ម៉ឺននាក់ ។
តួលេខខាងលើនេះបើតាមការបញ្ជាក់របស់សម្ដេចក្រឡាហោម ស ខេង នៅថ្ងៃទី២៦ ខែមីនា ឆ្នាំ២០២០នេះ នៅក្នុងឱកាសដែលសម្តេច បានអញ្ជើញជួបសំណេះសំណាលដោយផ្ទាល់ ជាមួយមន្ត្រីនៃអង្គភាព និងស្ថាប័ននានា នៅប៉ុស្តិ៍នគរបាលច្រកទ្វារអន្តរជាតិអូរស្មាច់ ព្រំដែនកម្ពុជា-ថៃ ស្ថិតក្នុងភូមិសាស្ត្រខេត្តឧត្តរមានជ័យ ។
សម្ដេចក្រឡាហោម ស ខេង បានថ្លែងថា នៅពេលពលរដ្ឋខ្មែរយើង បានវិលត្រឡប់ពីប្រទេសថៃ ចូលមកប្រទេសកម្ពុជាវិញ មន្ត្រីច្រកទ្វារព្រំដែនទាំងអស់ ត្រូវត្រៀមលក្ខណៈទទួល និងត្រូវមានវិធានការម៉ឺងម៉ាត់តាមក្បួនសុខាភិបាល ដើម្បីទប់ស្កាត់ការរីករាលជំងឺនេះ ។
សម្ដេចក្រឡាហោម បន្ថែមថា អាជ្ញាធរខេត្តឧត្តរមានជ័យ ក៏ត្រូវស្នើសុំកិច្ចសហការជាមួយភាគីថៃ ដើម្បីកំណត់ជាក់លាក់ នូវច្រកអនុញ្ញាតឱ្យពលរដ្ឋឆ្លងដែនវិលចូលប្រទេសដែរ ។
យ៉ាងណាក៏ដោយសម្ដេចក្រឡាហោម ក៏បានណែនាំឱ្យរដ្ឋបាលខេត្ត ត្រូវត្រៀមមន្ត្រីពាក់ព័ន្ធ នៅតាមបណ្ដាច្រករបៀងមួយចំនួន ដើម្បីធានាថា ប្រសិនពលរដ្ឋខ្លះងាកទៅឆ្លងដែនតាមច្រករបៀង គឺយើងអាចគ្រប់គ្រងពួកគាត់បាន ទាំងការកំណត់អត្តសញ្ញាណ និងការពិនិត្យសុខភាព ហើយតំណាលគ្នានេះ ក៏ត្រូវបន្តជំរុញការផ្សព្វផ្សាយអប់រំ ពួកគាត់ឱ្យបានដឹងពីសារៈសំខាន់ នៃការដាក់ឱ្យនៅដាច់ដោយឡែករយៈពេល១៤ថ្ងៃសិន ពេលធ្វើដំណើរទៅស្រុកកំណើតវិញ ដើម្បីទប់ស្កាត់ការឆ្លងជំងឺនេះដល់ក្រុមគ្រួសារសាច់ញាតិ និងអ្នកភូមិ៕
