រាជធានីភ្នំពេញ៖ កាលពីប៉ុន្មានថ្ងៃមុន មហាជនផ្ទុះប្រតិកម្មជាខ្លាំង ក្រោយពីបានឃើញរូបថតប៉ុន្មានសន្លឹក ដែលគេធ្វើរបងថ្មរំលោភមកលើផ្លូវ នៅលើបណ្តាញសង្គមហ្វេសប៊ុក ។ ពេលនេះ រូបភាពទាំងនោះ លោក សុខ លូ អភិបាលខេត្តកំពង់ធំ បានឃើញហើយ ព្រមទាំងណែនាំឲ្យលោកអភិបាលស្រុកបារាយណ៍ ចុះទៅពិនិត្យមើល បើឃើញដូចមានបង្ហោះលើហ្វេសប៊ុកនេះមែន ត្រូវវាយកម្ទេចចោលើតែម្ដង ដោយគ្មានការយោគយល់ឡើយ ។
យោងតាម Pheng Vannak News ដែលបានបង្ហោះកាលពី១ម៉ោងមុនមានខ្លឹមសារថា « ប្រហែលដោយមានការបារម្ភខ្លាច វីរុសកូវីដ១៩ ឆ្លងចូលទៅក្នុងផ្ទះពួកគាត់ មានគ្រួសារមួយរស់នៅឃុំសំរោង ស្រុក បារាយណ៍ ខេត្តកំពង់ធំ បានសាងសង់របងលើដីចំណីផ្លូវ ដើម្បីទប់ស្កាត់កុំអោយវីរុសកូវីដ១៩ ចូលផ្ទះពួកគាត់បាន ។
ពាក់ព័ន្ធនឹងការសាងសង់របងលើដីចំណីផ្លូវនេះ ឯកឧត្ដម សុខ លូ អភិបាលខេត្តកំពង់ធំ នៅមុននេះបន្តិចបានប្រាប់ខ្ញុំថា ឯកឧត្ដមបានណែនាំអោយអភិបាលស្រុកបារាយណ៍ ចុះទៅពិនិត្យមើលហើយ បើឃើញដូចមានបង្ហោះលើហ្វេសប៊ុកនេះមែន គឺអោយវាយកំទេចចោលតែម្ដងដោយគ្មានការយោគយល់ឡើយ»។
