រាជធានីភ្នំពេញ ៖ សម្តេចតេជោ ហ៊ុន សែន មានបំណងរៀបចំពិធីជប់លៀងជូនភ្ញៀវទេសចរដែលជាប់ក្នុងនាវា MS Westerdam អោយបានស្គាល់បេះដូងមនុស្សធម៌កម្ពុជាពិត នេះបើតាមរយៈហ្វេសប៊ុកផេកផ្លូវការរបស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ។
សម្តេចតេជោ ហ៊ុន សែន បានសរសេររៀបរាប់នៅលើបណ្ដាញសង្គមហ្វេសប៊ុក អោយដឹងថា កាលពីព្រឹកថ្ងៃទី១៧ ខែកុម្ភៈ ២០២០ នៅក្នុងពិធីបូកសរុបការងាររបស់«ក្រុមប្រឹក្សាជាតិកម្ពុជាដើម្បីស្ត្រី» នៅវិមានសន្តិភាព សម្តេចតេជោ បានបង្ហាញអារម្មណ៍សង្វេគ និងអាណិតអាសូរយ៉ាងខ្លាំងដល់អ្នកធ្វើដំណើរជាង ២,២០០នាក់ ដែលត្រូវបានជាប់នៅក្នុងនាវាទេសចរណ៍ដ៏ធំមួយ Ms Westerdam ដែលត្រូវបានកម្ពុជាទទួលស្វាគមន៍ អោយចូលសំចត នៅកំពង់ផែ ក្រុងព្រះសីហនុកាលពីថ្ងៃទី១៤ កុម្ភៈ ។
ដើម្បីបង្ហាញពីក្តីស្រឡាញ់ ភាពកក់ក្តៅ និងបេះដូងមនុស្សធម៌ពិតរបស់កម្ពុជា ចំពោះភ្ញៀវទេសចរទាំងអស់ មកពីនាវា MS Westerdam សម្តេចតេជោ ហ៊ុន សែន មានបំណងនឹងរៀបចំពិធីជប់លៀងជូនពួកគេទៀតផង ហើយសម្តេចតេជោ ក៏គ្រោងនឹងអញ្ជើញមន្ត្រីតំណាងទូត នៃប្រទេសនីមួយៗ ដែលមានពលរដ្ឋរបស់ខ្លួនកំពុងជាប់នៅកម្ពុជា ក្នុងនាវាទេសចរណ៍នេះ មានឱកាសបានមកជួបសួរសុខទុក្ខ និងចូលរួមរកមធ្យោបាយផ្សេងៗ ដើម្បីជួយពលរដ្ឋខ្លួនអោយឆាប់បានវិលត្រឡប់ទៅកាន់ប្រទេសកំណើតវិញ ។
ពិតណាស់ ចំពោះនាវាទេសចរណ៍ដែលមានអ្នកធ្វើដំណើរជាង ២,០០០នាក់ ដែលបានមកដល់ទីសុវត្ថិភាពក្នុងទឹកដីកម្ពុជាហើយ សម្តេចតេជោ ហ៊ុន សែន បានមានប្រសាសន៍បញ្ជាក់ច្បាស់ណាស់ថា បើសាម៉ីប្រទេសគេមិនទទួលខុសត្រូវទេ គឺកម្ពុជានឹងបន្តមើលថែពួកគេរហូតដល់ថ្ងៃបានវិលត្រឡប់ទៅកាន់ប្រទេសកំណើតវិញ ។
សូមជម្រាបផងដែរថា រាជរដ្ឋាភិបាលកម្ពុជា បានអនុញ្ញាតអោយអ្នកទេសចរចំនួន ៥០០នាក់ បានមកស្នាក់នៅបណ្តោះអាសន្ន នៅសណ្ឋាគារសុខាទីក្រុងភ្នំពេញ ដើម្បីរៀបចំសំបុត្រយន្តហោះចេញពីកម្ពុជាឆ្ពោះទៅកាន់ប្រទេសកំណើតពួកគេវិញ ក្រោយពីបានពិនិត្យសុខភាពយ៉ាងហ្មត់ចត់ ទៅលើអ្នកទេសចរមួយចំនួន ដែលគ្មានសញ្ញាវិជ្ជមាននៃមេរោគកូរ៉ូណា ឫកូវីដ១៩ (COVID-19) នោះទេ ៕
