សៀមរាប ៖ ម្ចាស់គណនីហ្វេសបុកឈ្មោះ Sopheak Love ចែកចាយនិងផ្សព្វផ្សាយ ព័ត៌មានមិនពិត ធ្វើឲ្យមានការភ័យខ្លាចដល់ប្រជាពលរដ្ឋខ្មែរ ពាក់ព័ន្ធករណីជំងឺឆ្លង បង្កដោយវីរុសកូរ៉ូណានោះ ត្រូវបានសមត្ថកិច្ច ហៅមកសាកសួរ និងធ្វើកិច្ចសន្យា ឲ្យបញ្ឈប់ការចែកចាយព័ត៌មានប្រឌិត បែបនេះទៀត នៅថ្ងៃទី៣០ មករា ២០២០នេះ ។
លោកឧត្តមសេនីយ៍ត្រី ហួត សុធី ស្នងការរងខេត្តសៀមរាប បានអោយដឹងថា កម្លាំងសមត្ថកិច្ច ផែនការងារសន្តិសុខ នៃស្នងការដ្ឋាននគរបាលខេត្ត និងកម្លាំងរបស់ការិយាល័យប្រឆាំងបទល្មើសបច្ចេកវិទ្យា បាននាំខ្លួនយុវតីម្នាក់ឈ្មោះ កាន់ សុភ័ក្រ អាយុ១៩ឆ្នាំ រស់នៅផ្ទះលេខ៥ ភូមិតាព្រហ្ម ឃុំសង្វើយ ស្រុកជីក្រែង ខេត្តសៀមរាប មានមុខរបរជាងអ៊ុតសក់ ដែលបានប្រើប្រាស់គណនីហ្វេសបុក ចែកចាយ និងផ្សព្វផ្សាយ ព័ត៌មានមិនពិត ពាក់ព័ន្ធនឹងការរកឃើញមានជំងឺរលាកសួត «កូរ៉ូណា» ក្នុងខេត្តសៀមរាប ធ្វើឲ្យមានការភ័យខ្លាចដល់ប្រជាពលរដ្ឋ ។
នាងបានចេញមុខមកសារភាពកំហុសរបស់ខ្លួន និងបានសន្យានៅចំពោះមុខសមត្ថកិច្ចថា នឹងមិនបន្តផ្សព្វផ្សាយព័ត៌មានមិនពិត ដែលបណ្តាលឲ្យមានការចលាចល ដល់ប្រជាជនក្នុងខេត្តសៀមរាប និងប្រជាពលរដ្ឋទូទាំងប្រទេសទៀតឡើយ ។ ក្រោយធ្វើកិច្ចសន្យារួច ត្រូវបានអនុញ្ញាតឲ្យត្រឡប់ទៅផ្ទះវិញ ៕