រាជធានីភ្នំពេញ ៖ ក្រោយពីសម្ដេចតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា បានបញ្ជាទៅលោក កែវ រ៉េមី និងនាយឧត្តមសេនីយ៍ សៅ សុខា ឲ្យស៊ើបអង្កេតលើករណីមនុស្សស្លាប់ដោយសាររងការធ្វើទារុណកម្ម នៅខេត្តបន្ទាយមានជ័យ នាយឧត្តមសេនីយ៍ សៅ សុខា បានចេញសេចក្តីសម្រេចបង្កើត គណៈកម្មការចំពោះកិច្ចមួយ ដើម្បីធ្វើអធិការកិច្ចនូវបាតុភាព ដែលបានកើតឡើងនៅបញ្ជាការដ្ឋានកងរាជអាវុធហត្ថ ខេត្តបន្ទាយមានជ័យ ។
សម្ដេចតេជោបញ្ជាបែបនេះ នៅក្នុងឱកាសជួបសំណេះសំណាល និងពិសាអាហារសាមគ្គី ជាលើកទី៤ ជាមួយអ្នកសារព័ត៌មាន សរុបជិត៦ពាន់នាក់ នៅមជ្ឈមណ្ឌលសន្និបាត និងពិព័រណ៍កោះពេជ្រ នៅល្ងាចថ្ងៃទី១៤ ខែមករា ឆ្នាំ២០២០ ។
សម្ដេចតេជោ ហ៊ុន សែន បញ្ជាក់យ៉ាងដូច្នេះថា« ខ្ញុំបានបញ្ជាទៅ កែវ រ៉េមី និងបញ្ជាទៅ នាយឧត្ដមសេនីយ៍ សៅ សុខា ឲ្យចាត់តាំងគណៈកម្មការស្រាវជ្រាវបន្ទាន់ លើបញ្ហាថា មានមនុស្សស្លាប់ នៅឯខេត្តបន្ទាយមានជ័យ ដោយសារការធ្វើទារុណកម្ម ប្រសិនបើយ៉ាងដូច្នេះមែន អ្នកដែលធ្វើឲ្យគេរបួសស្នាម រហូតដល់ស្លាប់ ត្រូវតែចាប់យកមកផ្ដទ្ទាទោសឲ្យខាតតែបាន ដោយមិនមានការអត់អោនទេ» ។
សូមជម្រាបថា កាលពីថ្ងៃទី២៨ ធ្នូ ២០១៩ ប្រជាពលរដ្ឋប្រមាណ២០០នាក់ តំណាងឱ្យ៦០០គ្រួសារ មកពីឃុំចង្ហារ ស្រុកអូរជ្រៅ ខេត្តបន្ទាយមានជ័យ បាននាំគ្នាតវ៉ា នៅមុខសាលាខេត្តបន្ទាយមានជ័យ ទាមទារឱ្យអាជ្ញាធរខេត្ត ចេញទៅជួបពួកគាត់ពន្យល់អំពីមូលហេតុ ដែលមិនឱ្យពួកគាត់កាន់កាប់ដីទំនាស់ ប៉ុន្តែពេលនោះ អាជ្ញាធរខេត្តមិនបានចេញជួបក្រុមអ្នកតវ៉ានោះឡើយ ។ នៅថ្ងៃនោះ ពលរដ្ឋក៏មិនព្រមត្រឡប់ទៅផ្ទះវិញដែរ ដោយរង់ចាំក្បែររបងសាលាខេត្ត រហូតដល់ម៉ោង២រសៀល ស្រាប់តែមន្ត្រីកងរាជអាវុធហត្ថខេត្តជាច្រើននាក់ ទៅបង្ក្រាបក្រុមអ្នកតវ៉ាទាំងនោះ និងបានចាប់មនុស្ស៥នាក់យកទៅសាកសួរ ដោយសារតែពួកគេបានតវ៉ារឿងទំនាស់ដីរបស់ពួកគាត់នៅស្រុកស្វាយចេក ។ អំឡុងពេលសមត្ថកិច្ចឃុំខ្លួននោះ មានពលរដ្ឋម្នាក់បានស្លាប់ និង៤នាក់ផ្សេងទៀត ត្រូវបានដោះលែងវិញនៅថ្ងៃទី៣ មករា ២០២០ ។
ប្រជាពលរដ្ឋម្នាក់ដែលស្លាប់នោះឈ្មោះ ទុយ ស្រស់ តំណាងពលរដ្ឋមានទំនាស់ដីធ្លីនៅភូមិជ្រៃ ឃុំចង្ហា ស្រុកអូរជ្រៅ បានស្លាប់នៅថ្ងៃទី១ មករា ២០២០ គឺក្រោយពេលមន្ត្រីកងរាជអាវុធហត្ថខេត្តបន្ទាយមានជ័យចាប់ខ្លួន និងបញ្ជូនទៅដាក់ឃុំ នៅទីបញ្ជាការកងរាជអាវុធហត្ថខេត្ត ចាប់ពីថ្ងៃទី២៨ ដល់ថ្ងៃទី៣១ ខែធ្នូ ឆ្នាំ២០១៩ ។ការស្លាប់នេះ ដោយខេត្តបញ្ជាក់ថា ដោយសារតែបញ្ហាញៀនស្រា ប៉ុន្តែអ្នកជាប់ឃុំជាមួយចំនួន ចោទថា ដោយសារការធ្វើទារុណកម្ម ដើម្បីបង្ខំយកចម្លើយសារភាព ។
លោក នូវ នឿន តំណាងម្នាក់ ក្នុងចំណោមមនុស្ស៣នាក់រួមមាន លោក អាន រួន លោក នូវ នឿន និងលោក ហ៊ឹម គីរី ដែលបានដាក់ពាក្យបណ្ដឹងនៅថ្ងៃទី១២ ខែមករា ២០២០ បានស្វែងរកកិច្ចអន្តរាគមន៍តាមរយៈមេធាវី អង្គការមិនមែនរដ្ឋាភិបាល គឺដើម្បីទាមទាររកយុត្តិធម៌សម្រាប់ខ្លួនលោកផ្ទាល់ និងមនុស្សផ្សេងទៀត ។
បើតាមលោក នឿន ក្នុងអំឡុងពេលចាប់ និងឃុំខ្លួននោះ គឺកងកម្លាំងកងរាជអាវុធហត្ថខេត្ត បានវាយធ្វើបាបពួកគាត់ស្ទើរស្លាប់។
លោកនូវ នឿន បន្ថែមថា៖ «ដាក់ខ្នោះរួចរុញចូលក្នុងឡាន វ៉ៃបន្ថែម បុកបន្ថែម កាច់ក និងវ៉ៃពីមុខ។ អ៊ីចឹង ពួកខ្ញុំត្រូវបានគេរុញចូលក្នុងឡានទាំង៥នាក់ រួចយកពួកខ្ញុំទម្លាក់នៅមុខដងទង់ជាតិ ។ ខ្ញុំស្មានថា ឱ្យពួកខ្ញុំគោរពទង់ជាតិ។ ពួកខ្ញុំ គេតម្រូវឱ្យអង្គុយនៅមុខដងទង់ជាតិហ្នឹងតែម្ដង ។ បន្ទាប់មក គេឱ្យតម្រៀបជួរគ្នា ហើយចាប់ផ្ដើមទាត់វ៉ៃម្នាក់ៗបីបួនជើងៗ ។ បើខ្ញុំវិញ គេ(ប៉េអឹម)ទាត់បីជើង រួចថែម១ដៃទៀត របូតធ្មេញមួយចំហៀង» ។
លោក នូវ នឿន បញ្ជាក់ថា ក្នុងចំណោមតំណាង៥នាក់ ដែលត្រូវបានកងរាជអាវុធហត្ថចាប់ខ្លួន គឺមានតែ៣នាក់ប៉ុណ្ណោះ សម្រេចចិត្តដាក់ពាក្យប្តឹង ប្រឆាំងការធ្វើទារុណកម្មនេះ ចំណែកអ្នកផ្សេងទៀត លោកមិនបានដឹងថា មានមូលហេតុអ្វីបានពួកគេមិនប្តឹង។ លោកដាក់ការសង្ស័យថា អ្នកទាំងនោះមានការភ័យខ្លាចចំពោះសុវត្ថិភាព ។
ករណីខាងលើនេះ រដ្ឋបាលខេត្តបន្ទាយមានជ័យ បានចេញសេចក្តីប្រកាសព័ត៌មានករណីស្លាប់ប្រជាពលរដ្ឋឈ្មោះ ទុយ ស្រស់ ភេទប្រុស ឆ្នាំកំណើត១៩៨៥ បច្ចុប្បន្នរស់នៅភូមិជ្រៃ ឃុំចង្ហា ស្រុកអូរជ្រៅ ខេត្តបន្ទាយមានជ័យ បណ្តាលឲ្យបាត់បង់ជីវិត ។ រដ្ឋបាលខេត្តបន្ទាយមានជ័យ សូមធ្វើការបំភ្លឺតាមដំណើររឿងដូចខាងក្រោម ៖