ក្រុងម៉ានីល ៖ សាលារៀន និងក្រុមហ៊ុននានា បានបិទទ្វារជាបណ្តោះអាសន្ននៅទូទាំងទីក្រុងម៉ានីល ប្រទេសហ្វីលីពីន នាថ្ងៃចន្ទ ទី១៣ មករា ២០២០ ខណៈដែលភ្នំភ្លើង បានបាញ់ផេះពាសពេញទីក្រុង ហើយអ្នកជំនាញខាងរញ្ជួយដី បានព្រមានថា ការផ្ទុះអាចកើតឡើងគ្រប់ពេល ដែលអាចបង្កជារលកយក្សស៊ូណាមិ ។
មនុស្សរាប់ពាន់រាប់ម៉ឺននាក់ ត្រូវបានបង្ខំឱ្យជម្លៀសចេញពីផ្ទះរបស់ពួកគេ នៅជុំវិញ តំបន់ភ្នំភ្លើងតាអាល់ ជាកន្លែងទាក់ទាញភ្ញៀវទេសចរដ៏ពេញនិយម នៅចំកណ្តាលបឹងដ៏ទាក់ទាញ មានចម្ងាយប្រហែល៧០គីឡូម៉ែត្រខាងត្បូងទីក្រុងម៉ានីល ។
លោក ម៉ាទីន អង់តូនីញ៉ូ ប្រធានជំនាញស្រាវជ្រាវវិទ្យាសាស្ត្រ នៃវិទ្យាស្ថានភ្នំភ្លើង បានប្រាប់អ្នកយកព័ត៌មានថា “ល្បឿននៃការកើនឡើងពីសកម្មភាពភ្នំភ្លើងនេះ បានធ្វើឱ្យយើងភ្ញាក់ផ្អើលយ៉ាងខ្លាំង ហើយការផ្ទុះមួយអាចបណ្តាលឱ្យរលកយក្សស៊ូណាមិរីករាលដាលពាសពេញបឹងបាន” ។
គិតត្រឹមម៉ោង១២និង៤៩នាទីរំលងអាធ្រាត្រឈានចូលថ្ងៃចន្ទនេះ វាបានបញ្ចេញកម្អែរភ្លើងខ្លះ និងបន្តជះផេះយ៉ាងធំសម្បើមឡើងទៅលើផ្ទៃមេឃ កម្ពស់១៥.០០០ម៉ែត្រ លាយឡំដោយរន្ទះដ៏គួរឱ្យភ្ញាក់ផ្អើល នៅពីលើភ្នំភ្លើង ជាបាតុភូតដែលអាចយល់បានតិចតួច ដែលត្រូវបានគេសន្មតថា ជាអគ្គិសនីថេរ ។
លោក ហ្គែរី ណាថាណួន អភិបាលក្រុង Talisay បានឲ្យដឹងថា មនុស្សជិត៥ម៉ឺននាក់ដែលរស់នៅក្បែរភ្នំភ្លើង តាអាល់ បានជម្លៀសខ្លួនចាប់តាំងពីយប់ថ្ងៃអាទិត្យ ខណៈមួយចំនួនតូចដែលពុំទាន់ចេញ នឹងត្រូវបង្ខំឲ្យចេញដើម្បីសុវត្ថិភាព ។ ការផ្ទុះបញ្ចេញផ្សែង និងផេះ នៃភ្នំភ្លើងនោះបានបង្កឲ្យកម្ទេចផេះធ្លាក់នៅតំបន់ជុំវិញនោះ ៕
