ក្រុមបាល់ទាត់ជម្រើសជាតិ យុវជនអាយុក្រោម ២២ឆ្នាំកម្ពុជា ខកខានទទួលបានមេដាយសំរឹទ្ធ ក្រោយចាញ់គូប្រជែង U22 របស់មីយ៉ាន់ម៉ា ដោយបាល់ប៉េណាល់ទីកាត់សេចក្តី ៤-៥ បន្ទាប់ពីប្រកួតពេញម៉ោង ៩០នាទីស្មើគ្នា ២-២ នៅព្រឹត្តិការណ៍កីឡា SEA Games 2019 លើកទី៣០ នៅប្រទេសហ្វីលីពីន ។
បន្ទាប់ពីលោកអាជ្ញាកណ្តាលតៃវ៉ាន់ Chen Hsin-chuan ផ្លុំកញ្ចែផ្តើមការប្រកួត កីឡាករកម្ពុជាបានបញ្ជូនបាល់ឲ្យគ្នាដោយ សៀង ចន្ធា ជាអ្នកស៊ុតចុងក្រោយ ដែលជួយឲ្យកម្ពុជានាំមុខ ១-០ ត្រឹម១៧វិនាទីដំបូង ។
៨នាទីក្រោយមក Mann Aung Kaung បានវាយបកតាមស្មើសម្រាប់មីយ៉ាន់ម៉ា មុនពេលដែល Myat Kaung Khant រកបានគ្រាប់នាំមុខកម្ពុជា ២-១ នៅនាទី៣៥ ។
ឈានដល់នាទី៧២ កម្ពុជាមានឱកាសបាល់ពិន័យពីចម្ងាយ ហើយ កែវ សុខផេង បានទាត់បាល់ពីចម្ងាយចូលទីយ៉ាងល្អ ដែលនាំឲ្យមានលទ្ធផលស្មើ ២-២។
ការប្រកួតដែលត្រូវបានធ្វើឡើងនៅកីឡដ្ឋាន Rizal Memorial ដែលស្ថិតក្នុងទីក្រុងម៉ានីល ប្រទេសហ្វីលីពីននារសៀលថ្ងៃអង្គារ ទី១០ ខែធ្នូ ២០១៩នេះ ៕
