រាជធានីភ្នំពេញ ៖ រោងការ រោងបុណ្យបិទផ្លូវ នៅតែជាបញ្ហាចោទ ក្នុងរាជធានីភ្នំពេញ វាមិនត្រឹមតែធ្វើឲ្យស្ទះដល់អ្នកដំណើរមិនអាចធ្វើចរាចរណ៍បាន ប៉ុណ្ណោះទេ ត្រូវកកស្ទះសំរាមយ៉ាងហោច២ថ្ងៃ ព្រោះរថយន្តប្រមូលសំរាមមិនអាចឆ្លងកាត់ចូលទៅលំនៅឋានប្រជាពលរដ្ឋដែលស្ថិតនៅតាមបណ្តោយផ្លូវ ដែលមានរោងបុណ្យ ឬរោងការ ដែលបិទផ្លូវទាំងស្រុង នោះបាន ។
ស្រាប់តែថ្មីៗនេះមានហ្វេសប៊ុកមួយឈ្មោះ Sokphath បានបង្ហោះសេចក្តីជូនដំណឹងរបស់សាលាទើបដឹងថា នេះប្រធានបទថ្មីមួយទៀត ដែលអាជ្ញាធរត្រូវគិតពិចារណា ឬចាត់វិធានការចំពោះរោងបុណ្យ ឬរោងការ ដែលបិទផ្លូវទាំងស្រុងនេះ ធ្វើអោយក្មេងៗនៅសាលាវេស្ទើនអន្តរជាតិ ថ្នាក់មត្តេយ្យ ត្រូវខាតការសិក្សាអស់រយៈពេល២ថ្ងៃ ផងដែរ គិតចាប់តាំងពីថ្ងៃទី១១ ដល់ទី១២ ខែធ្នូ ឆ្នាំ២០១៩ ខាងមុខនេះ មូលហេតុមានការបិទផ្លូវរៀបចំពិធីមង្គលការ នៅភូមិគ្រឹះ ទុលមុខសាលាវេស្ទើនអន្តរជាតិសាខា បឹងត្របែកទី១ តែម្តង ។
មហាជននៅចាំបានថា លោកឃួង ស្រេង អភិបាលរាជធានីភ្នំពេញលែងអនុញ្ញាតឱ្យសង់រោងការ រោងបុណ្យបិទផ្លូវដូចមុនទៀតហើយ ។
ក្នុងកិច្ចប្រជុំគណៈបញ្ជាការឯកភាពរាជធានីភ្នំពេញ នៅរដ្ឋបាលរាជធានីភ្នំពេញ កាលពីរសៀលថ្ងៃទី១២កញ្ញា ឆ្នាំ២០១៨ លោកឃួង ស្រេង អភិបាលរាជធានីភ្នំពេញ បានណែនាំ និងជំរុញឲ្យអាជ្ញាធរគ្រប់ខណ្ឌទាំងអស់ ត្រូវចាត់មន្ត្រីចុះត្រួតពិនិត្យរាល់ការសុំច្បាប់ និងសាងសង់រោងបុណ្យ ឬរោងការ ណាដែលបិទផ្លូវទាំងស្រុង គឺមិនអនុញ្ញាតឡើយ និងត្រូវជម្រុញឲ្យពួកគាត់គោរពច្បាប់ និងការណែនាំពីរដ្ឋបាលរាជធានីភ្នំពេញ ចៀសវាងមានការថ្នាំងថ្នាក់ពីប្រជាពលរដ្ឋ ។
លោកឃួង ស្រេង បានលើកឡើងថា អាជ្ញាធរមូលដ្ឋានគ្រប់ខណ្ឌ សង្កាត់ និងកំលាំងមានសមត្ថកិច្ច ត្រូវចុះត្រួតពិនិត្យឲ្យបានជាប្រចាំ ចំពោះការសាងសង់រោងបុណ្យ រោងការ ធ្វើឲ្យមានការកកស្ទះចរាចរណ៍ ដែលប្រជាពលរដ្ឋថ្នាំងថ្នាក់ នាពេលកន្លងមកនោះ គួរម្ចាស់រោងបុណ្យ ឬរោងការ រកទីតាំងណា ដែលសមស្រប មិនប៉ះពាល់ផ្លូវសាធារណៈ ដូចជា ទីអារាម តាមភោជនីយដ្ឋាន ឬទីតាំងណាដែលសមរម្យ ៕
