រាជធានីភ្នំពេញ ៖ បុរសម្នាក់ត្រូវកម្លាំងនាយកដ្ឋាននគរបាលព្រហ្មទណ្ឌ នៃអគ្គស្នងការដ្ឋាននគរបាលជាតិ ចាប់ខ្លួនតាមពាក្យបណ្ដឹងរបស់លោក ញឹក ប៊ុនឆៃ ប្រធានគណបក្សខ្មែររួបរួមជាតិ ពាក់ព័ន្ធករណីឆបោកប្រាក់ប្រមាណ៧ម៉ឺនដុល្លារ ។
ជនសង្ស័យឈ្មោះ កាយ ម៉េង អាយុ៤១ឆ្នាំ មានទីលំនៅក្រុងបាវិត ត្រូវចាប់ខ្លួនតាមដីកាបញ្ជាឲ្យចូលខ្លួនរបស់លោក កែវ សុធា ព្រះរាជអាជ្ញា នៃអយ្យការអមសាលាដំបូងរាជធានីភ្នំពេញ កាលពីថ្ងៃទី១៩ វិច្ឆិកា ម្សិលមិញនេះ នៅតាមបណ្ដោយផ្លូវជាតិលេខ៦A ស្ថិតក្នុងភូមិប្រាសាទ ឃុំប្រាសាទ ស្រុកសន្ទុក ខេត្ដកំពង់ធំ ហើយត្រូវបានកម្លាំងសមត្ថកិច្ចបញ្ជូនទៅសាលាដំបូងរាជធានីភ្នំពេញ នៅរសៀលថ្ងៃទី២០ ខែវិច្ឆិកានេះ ដើម្បីចាត់ការបន្ដតាមនីតិវិធី ។
យ៉ាងណាពាក់ព័ន្ធករណីឆបោកប្រាក់នេះ សមត្ថកិច្ចនៅមិនទាន់បញ្ជាក់អោយលម្អិតនៅឡើយទេ ប៉ុន្តែអោយដឹងខ្លីថា ប្រធានគណបក្សខ្មែររួបរួមជាតិគឺលោក ញឹក ប៊ុនឆៃ បានដាក់ពាក្យទៅនាយកដ្ឋាននគរបាលព្រហ្មទណ្ឌ កាលពីថ្ងៃទី០១ វិច្ឆិកា ២០១៩កន្លងទៅនេះដោយប្ដឹងពីឈ្មោះ កាង ម៉េង និងបក្ខពួកម្នាក់ទៀត ករណីខ្ចីលុយ តែព្យាយាមគេចវេសមិនសង ៕