ប្រធានសមាគមផលិតអំបិលខេត្តកំពត និងកែប លោក ប៊ុន បារាំង បានថ្លែងកាលពីថ្ងៃទី១៧ ខែវិច្ឆិកា ឆ្នាំ២០១៩ ម្សិលមិញនេះថា កម្ពុជាបាននាំចូលអំបិលពីប្រទេសឥណ្ឌា ក្នុងបរិមាណប្រហែល ៥,០០០តោន ហើយមកដល់ពេលនេះបរិមាណអំបិលក្នុងស្តុកសល់ប្រហែលជាង៥០០តោន តែប៉ុណ្ណោះ ។
នេះជាលើកទី១ ហើយដែលកម្ពុជា បាននាំចូលអំបិលពីប្រទេសឥណ្ឌា មកបំពេញតម្រូវការប្រើប្រាស់ក្នុងស្រុក ខណៈក្នុងឆ្នាំ២០១៨ កម្ពុជាបានជួបបញ្ហាខ្វះអំបិល ដោយសារការប្រែប្រួលអាកាសធាតុ បាននាំចូលអំបិលពីក្រៅប្រទេស៣ម៉ឺនតោន ក្នុងនោះចិន២ម៉ឺនតោន និងថៃ១ម៉ឺនតោន ។
លោកបានឲ្យដឹងថា កម្ពុជាបានផ្លាស់ប្តូរទៅនាំចូលពីប្រទេសឥណ្ឌា ដោយសារកន្លែងផលិតអំបិលនៅប្រទេសចិន ជួបគ្រោះទឹកជំនន់ដែលធ្វើឲ្យការផលិតរបស់ពួកគេធ្លាក់ចុះ និងមានតម្លៃខ្ពស់ជាងមុន ។
លោក ប៊ុន បារាំង លើកឡើងថា «អំបិលនាំចូលពីប្រទេសឥណ្ឌា គឺមានគុណភាពល្អ និងតម្លៃសមរម្យ ប្រមាណ៩៥ដុល្លារ ក្នុង១តោន ដែលជាតម្លៃប្រហាក់ប្រហែលនឹងអំបិលផលិតក្នុងស្រុក ហើយតម្លៃនេះ មិនធ្វើឲ្យប៉ះពាល់ដល់ទីផ្សារអ្នកផលិតក្នុងស្រុកទេ» ។
ជាមួយគ្នានេះ លោកក៏បានអះអាងដដែលថា ៖ «នៅពេលដែលយើងផលិតអំបិលបានវិញ យើងនឹងបឈ្ឈប់ការនាំចូលពីបរទេស ។ គ្មាននរណាម្នាក់ក្នុងសហគមន៍យើងចង់នាំអំបិលគេចូលនោះទេ ប៉ុន្តែការដោយសារតែកម្ពុជាជួបបញ្ហាអាកាសធាតុមិនល្អ ដោយមានភ្លៀងធ្លាក់ច្រើនពេក ក្នុងអំឡុងពេលផលិត និងប្រមូលផល ធ្វើឲ្យទិន្នផលអំបិលនៅកម្ពុជាធ្លាក់ចុះប្រមាណជាបីបួនឆ្នាំចុងក្រោយនេះ ទើបយើងសម្រេចនាំចូលពីបរទេស ដើម្បីបំពេញតម្រូវការក្នុងស្រុក» ។
សូមជម្រាបថា ក្នុងមួយឆ្នាំៗ កម្ពុជាមានតម្រូវការអំបិលប្រើប្រាស់ ប្រមាណ១០ម៉ឺនតោន ។ ហើយបច្ចុប្បន្នស្រែអំបិលនៅកំពត-កែប មានផ្ទៃដីជាង៤,៦០០ហិកតា អាចផលិតអំបិលបានប្រហែលជាង ៣០,០០០ តោន ក្នុង១ឆ្នាំ ៕
