អារ៉ាប់ប៊ីសាអូឌីត ៖ ថ្មីៗនេះ ស្ត្រីបង់ក្លាដែសម្នាក់ដែលជាអ្នកបម្រើការងារតាមផ្ទះ នៅប្រទេសអារ៉ាប់ប៊ីសាអូឌីត បានបញ្ចេញវីដេអូដ៏គួរឱ្យភ្ញាក់ផ្អើលមួយ ដែលនាងនិយាយអំពីការរំលោភបំពានផ្លូវភេទពីសំណាក់ថៅកែរបស់នាង ។
ស្ត្រីរងគ្រោះ មានអាយុ២៥ឆ្នាំ បានលួចទៅវីដេអូខលទៅក្រុមគ្រួសារដោយសម្ងាត់កាលពីដើមខែវិច្ឆិកានេះ នាងនិយាយទាំងទឹកភ្នែក ប្រាប់អំពីការរំលោភបំពានផ្លូវភេទ និងរងទារុណកម្មពីសំណាក់ថៅកែ ហើយនាងទទូចអង្វរសុំអនុញ្ញាតិឱ្យបានត្រឡប់ទៅប្រទេសបង់ក្លាដែសវិញ បន្ទាប់ពីត្រូវបានគេចាប់ឃុំឃាំងអស់រយៈពេលជាង២សប្តាហ៍មកហើយ នាងគឺជាស្ត្រីម្នាក់ ក្នុងចំណោមស្ត្រី៣០០,០០០នាក់ ដែលបានធ្វើដំណើរទៅធ្វើការនៅក្រៅប្រទេស តាមរយៈក្រុមហ៊ុនមួយ ។
តាមរយៈវីដេអូដែលអង្គការ BRAC ទទួលបាន គឺនាងរៀបរាប់ថា «ខ្ញុំប្រហែលជារស់មិនបានយូរទេ សូមជួយសង្គ្រោះខ្ញុំផង ! ពួកគេបានចាក់សោខ្ញុំ រយៈពេល១៥ថ្ងៃហើយ ហើយពួកគេមិនបានផ្តល់អាហារអ្វីទេ ពួកគេគំរាមចាប់រំលោភ ដោយដុតដៃរបស់ខ្ញុំដោយប្រេងឆៅ ហើយចងខ្ញុំ ។ ពួកគេបាននាំខ្ញុំ ពីផ្ទះមួយទៅផ្ទះមួយទៀត នៅក្នុងផ្ទះដំបូង ពួកគេបានធ្វើទារុណកម្មរំលោភបំពានផ្លូវភេទខ្ញុំ ហើយវាយខ្ញុំម្តងហើយម្តងទៀត បន្ទាប់មកបញ្ជូនខ្ញុំទៅកន្លែងមួយទៀត ដែលខ្ញុំទទួលរងដូចគ្នា ។ ខ្ញុំមិនគិតថាខ្ញុំនៅរស់ទេ ខ្ញុំគិតថាខ្ញុំស្លាប់ហើយ ពួកគេបានធ្វើទារុណកម្មវាយដំ និងរំលោភខ្ញុំ សូមជួយសង្គ្រោះខ្ញុំផង យកខ្ញុំទៅឆ្ងាយពីទីនេះ» ។
ក្រោយវីដេអូឃ្លីបនេះបែកធ្លាយលើបណ្តាញសង្គមធ្វើអោយមានការតវ៉ាជាច្រើននៅរដ្ឋធានីដាកា ប្រទេសបង់ក្លាដែស ហើយប្រជាជនបង់ក្លាដែសបានអំពាវនាវឱ្យអាជ្ញាធរប្រទេសទាំង២ ធ្វើមាតុភូមិនិវត្តន៍រូបនាង មកប្រទេសកំណើតវិញ ។
កាលពីខែមុន សាកសពរបស់ជនចំណាកស្រុកម្នាក់ឈ្មោះ Nazma Begum អាយុ៤២ឆ្នាំ ជាអ្នកបម្រើការងារតាមផ្ទះ ត្រូវបានប្រទេសអារ៉ាប់ប៊ីសាអូឌីត បញ្ជូនមកវិញ បន្ទាប់ពីនាងបានទូរស័ព្ទទៅប្រាប់កូនប្រុសរបស់នាង ម្តងហើយម្តងទៀត ដើម្បីឲ្យជួយសង្គ្រោះនាង ។ នាងនិយាយប្រាប់កូនថា រូបនាងត្រូវបានគេធ្វើទារុណកម្ម ហើយប៉ូលិសរកឃើញថា នាងបានស្លាប់ ដោយសារជំងឺ ដែលមិនបានព្យាបាល ។
អង្គការ BRAC ដែលមានមូលដ្ឋាននៅទីក្រុងដាកា ដែលជាអង្គការសប្បុរសធម៌ដ៏ធំបំផុតមួយរបស់ពិភពលោក បានធ្វើការសម្ភាសន៍ទៅលើក្រុមស្ត្រីជាជនចំណាកស្រុកបង់ក្លាដែស អោយដឹងថា មានស្រ្តីប្រមាណជា៦១ភាគរយ និយាយថា ពួកនាងត្រូវបានរំលោភបំពានលើរាងកាយ ។ ហើយ១៤ភាគរយទៀត ប្រាប់ថា ពួកនាងត្រូវបានរំលោភបំពានផ្លូវភេទ ។ ហើយបើតាមរបាយការណ៍អង្គការដដែលនេះថា នៅឆ្នាំ២០១៩នេះ សាកសពពលការិនីចំនួន៤៨នាក់ ត្រូវបានបញ្ជូនមកពីប្រទេសអារ៉ាប់ប៊ីសាអូឌីតវិញ ៕