ភ្នំពេញ ៖ ប៉ូលិសម៉ាឡេស៊ីបានចាប់ខ្លួនអតីតសមាជិករបស់គណបក្សសង្គ្រោះជាតិចំនួនពីរនាក់ តាមការស្នើសុំរបស់អាជ្ញាធរកម្ពុជា នៅពេលដែលពួកគេ កំពុងរង់ចាំធ្វើដំណើរតាមយន្តហោះ ពីម៉ាឡេស៊ីឆ្ពោះទៅកាន់ប្រទេសថៃ ដើម្បីអមដំណើរវិលត្រឡប់របស់លោក សម រង្ស៊ី ចូលមកកម្ពុជានៅថ្ងៃទី៩ វិច្ឆិកា ខាងមុខ ។
អតីតសមាជិកគណបក្ស CNRP ដែលអាជ្ញាធរម៉ាឡេស៊ីចាប់ខ្លួន មានឈ្មោះ ហេង ស៊ាងលាង និងកញ្ញា ងឹម គាថា ត្រូវបាន សាកសួរ និងឃុំខ្លួន ដោយប៉ូលិសអន្តោប្រវេសន៍ម៉ាឡេស៊ី កាលពីយប់ថ្ងៃទី៤ ខែវិច្ឆិកា ឆ្នាំ២០១៩ ។
បើតាមលោកឧត្តមសេនីយ៍ ឆាយ គឹមខឿន អ្នកនាំពាក្យអគ្គស្នងការនគរបាលជាតិ បានបញ្ជាក់ឲ្យដឹងថា គិតត្រឹមរសៀលថ្ងៃទី៦ ខែវិច្ឆិកានេះ អាជ្ញាធរម៉ាឡេស៊ីបានចាប់ឃាត់ខ្លួនមនុស្សចំនួនពីរនាក់ហើយ គឺអនុវត្តតាមដីកាតាមចាប់របស់កម្ពុជា ដែលបានស្នើសុំ ហើយអ្នកទាំង២ នឹងត្រូវបញ្ជូនមកកម្ពុជាវិញ នៅថ្ងៃទី៧ ខែវិច្ឆិកា ឆ្នាំ២០១៩ស្អែកនេះ ៕