ថ្ងៃទី០៩ វិច្ឆិកា ២០១៩ ជាថ្ងៃដែលលោក សម រង្ស៊ី និងសហការី កំណត់វិលត្រឡប់ចូលប្រទេសកម្ពុជាវិញតាមការសន្យា ស្រាប់តែមុនដល់ថ្ងៃកំណត់មកវិញ មេបាតុករវ័យក្មេងនៅហុងកុង សរសេរលើបណ្តាញសង្គម គាំទ្រនូវដំណើរមាតុភូមិនិវត្តន៍នេះផងដែរ ហើយថែមទាំងបានស្នើឱ្យសហគមន៍អន្តរជាតិជួយឃ្លាំមើលព្រឹត្តិការណ៍នេះថែមទៀតផង ។
តាមរយៈបណ្តាញសង្គម ធ្វីតធ័រ (Twitter) កាលពីថ្ងៃទី៣១ ខែតុលា កន្លងទៅនេះ លោក ចូសហ័រ វ៉ុង Joshua Wong មេដឹកនាំក្រុមបាតុករនៅទីក្រុងហុងកុង បានសរសេរដូច្នេះថា ៖ «លោក ហៃ វណ្ណា នឹងត្រឡប់ទៅកាន់ប្រទេសកម្ពុជាជាមួយមេដឹកនាំរបស់គាត់ គឺលោក សម រង្ស៊ី ដែលជាប្រធានស្តីទីគណបក្សសង្គ្រោះជាតិ នៅថ្ងៃទី០៩ ខែវិច្ឆិកា ដើម្បីស្តារលទ្ធិប្រជាធិបតេយ្យ និងសិទ្ធិមនុស្សឡើងវិញនៅកម្ពុជា ។ ដូច្នេះហើយ ខ្ញុំសូមអំពាវនាវឱ្យសហគមន៍អន្តរជាតិ ធ្វើការឃ្លាំមើលពីព្រឹត្តិការណ៍នេះផង» ។ ជាមួយនឹងការអំពាវនាវយ៉ាងនេះ លោកមេបាតុករវ័យក្មេងរូបនេះ ក៏បានបង្ហាញការគាំទ្រដល់ដំណើរមាតុភូមិនិវត្តន៍របស់លោក សម រង្ស៊ី ផងដែរ ដោយបញ្ជាក់ពីជំហរឈរខាងលោក សម រង្ស៊ី ព្រោះលោកចាត់ទុកថា ដំណើរវិលត្រឡប់របស់លោក សម រង្ស៊ីនេះ គឺដើម្បីលទ្ធិប្រជាធិបតេយ្យ ។
ឆ្លើយតបនឹងការអំពាវនាវនេះ លោក ផៃ ស៊ីផាន អ្នកនាំពាក្យរដ្ឋាភិបាល តាមរយៈហ្វេសប៊ុករបស់លោកនៅថ្ងៃទី១ ខែវិច្ឆិកានេះ លោកបានសរសេរយ៉ាងដូច្នេះថា ៖ «ខ្ញុំមានសេចក្តីសោកស្ដាយ និងហួសចិត្ត ចំពោះការលើកឡើងរបស់មេបាតុករនៅទីក្រុងហុងកុង លោក ចូសហ័រ វ៉ុង (JOSHUA WONG) ដែលតាំងខ្លួនជាបងធំនយោបាយនៅក្នុងតំបន់ ។ ការលើកឡើងនេះ គឺមិនត្រឹមតែបង្ហាញការយល់ដឹង មិនច្បាស់ចំពោះបញ្ហានយោបាយនៅកម្ពុជានោះទេ ថែមទាំងការចំអកឡកឡឺយ ដ៏ធ្ងន់ធ្ងរមួយប្រឆាំងនឹងលទ្ធិប្រជាធិបតេយ្យ និងនីតិរដ្ឋកម្ពុជា ។ សម រង្ស៊ី មិនមែនជាមេបាតុកម្មនោះទេ ដែលខុសគ្នាពីលោក ចូសហ័រ វ៉ុង (JOSHUA WONG) ដែលជាមេបាតុករនៅទីក្រុងហុងកុង ។ សម រង្ស៊ី ជាមេដឹកនាំរដ្ឋប្រហារ ផ្ដួលរំលំរាជរដ្ឋាភិបាលស្របច្បាប់ កើតចេញពីការបោះឆ្នោតសកល ដែលមានគណបក្សចូលរួមចំនួន២០ ។ សម រង្ស៊ី ជាអ្នកដឹកនាំធ្វើរដ្ឋប្រហារ ដែលមានគម្រោងថវិកា រៀបចំកងកម្លាំងប្រដាប់អាវុធក្នុងកិច្ចបម្រើសកម្មភាពក្បត់ជាតិរបស់ខ្លួន និងបក្សពួក ។ សម រង្ស៊ី រៀបចំសកម្មភាពញុះញុង យុវជន កម្មករ និងប្រជាពលរដ្ឋ ក្នុងចលនារដ្ឋប្រហារ និងភាពរងគ្រោះរបស់មហាជនជាចំណាប់ខ្មាំង ដើម្បីជោគជ័យក្នុងកិច្ចរដ្ឋប្រហាររបស់ខ្លួន ។ ការធ្វើវិទ្ធង្សនា និងវិច្ឆេទកម្ម ក្នុងវិស័យសង្គមកិច្ច និងសេដ្ឋកិច្ចដែលមិនអាចអត់ឱនអោយបាន ។ សម រង្ស៊ី ត្រូវបានតុលាការផ្ដន្ទាទោសជាច្រើនករណី និងជាឧក្រិដ្ឋជន ។ សម រង្ស៊ី និងបក្សពួកជាក្រុមបំផ្លាញ ជាតិ សាសនា ព្រះមហាក្សត្រ និងសន្តិភាពកម្ពុជា» ៕