ខេត្តតាកែវ ៖ គ្មានទេការបង្ក្រាបរបស់មន្ត្រីមានសមត្ថកិច្ចចំពោះជនជាតិវៀតណាម ដែលចូលមកនេសាទនៅក្នុងស្រុកបុរីជលសា និងស្រុកអង្គរបុរី ខេត្តតាកែវ ព្រោះថារយៈពេលប៉ុន្មានថ្ងៃជាប់ៗគ្នានេះ គេរាយការណ៍ថា បណ្តាអ្នកនេសាទជនជាតិវៀតណាមកាន់តែច្រើន បានសម្រុកចូលមកនេសាទក្នុងទឹកដីខ្មែរ ដោយបានបង់ប្រាក់ទៅតាមទំហំ នៃបទល្មើសជលផល ដោយប្រើឧបករណ៍ខុសច្បាប់ជាច្រើន ។
បើតាមសារព័ត៌មានក្នុងស្រុកបានផ្សាយថា ទូកជនជាតិវៀតណាមរាប់សិបគ្រឿងចូលមកនេសាទក្នុងទឹកដីខ្មែរនេះ ត្រូវបានក្រុមអ្នកនេសាទជនជាតិវៀតណាម បានប្រាប់ថា ពួកគេ បានបង់លុយឲ្យអ្នករត់ការឈ្មោះ កេ ជាជនជាតិវៀតណាមដូចគ្នា តាមតម្លៃខុសៗគ្នា ។ បើតាមការរៀបរាប់ តម្លៃដែលត្រូវបង់រួមមាន ៖
-ទូកនេសាទដាក់លបក្តាមបង់លុយ ៧លានដុង (ស្មើនឹងប្រាក់សហរដ្ឋអាមេរិក ជាង៣០០ដុល្លារ) ។
-ទូកដាក់លបប្រើសមួយរយ ហៅលបនរក ឬលបពោះវៀនជ្រូក បង់១១លានដុង ។
-ទូកដាក់បង្កងបង់ ១២លានដុង ។
-ទូកដាក់ឡុកសៃយ៉ឺនស្បៃមុងខ្នាតតូចបង់ ១៣លានដុង
-ទូកដាក់ឡុកសំណាញ់ក្រឡាញឹក និងសៃយ៉ឺនស្បៃមុងខ្នាតយក្សបង់ ១៥លានដុងក្នុងមួយរដូវ ។
-របាំងធ្នួសសៃយ៉ឺនស្បៃមុងខ្នាតយក្ស ក្នុងមួយខ្សែៗតាមវែងខ្លីត្រូវបង់លុយឲ្យទៅឈ្មោះ កេ ជាជនជាតិវៀតណាមដែលជាអ្នករត់ការ ក្នុងមួយខ្សែចាប់ពី ១ម៉ឺនដុល្លារ ទៅ ២ម៉ឺនដុល្លារ ។
ទោះជាយ៉ាងនេះក្តី សេចក្តីរាយការណ៍មិនបានបញ្ជាក់ថា លុយដែលបង់ឲ្យឈ្មោះ កេ ដែលជាអ្នករត់ការនោះ ត្រូវបានយកទៅចែកចាយបង់បន្តឲ្យអ្នកណានោះទេ ប៉ុន្តែគេគ្រាន់តែបានបញ្ជាក់ថា ករណីបែបនេះ គឺបានធ្វើជាច្រើនឆ្នាំមកហើយ ។
យ៉ាងណា បទល្មើសនេសាទខុសច្បាប់ ចូលមកដោយបង់លុយទាំងនេះ ភ្នាក់ងារព័ត៌មានយើងនៅមិនទាន់អាចសុំការបកស្រាយពីអាជ្ញាធរ និងមន្ត្រីជំនាញបាននៅឡើយទេ នៅព្រឹកថ្ងៃនេះ ។
សូមរម្លឹកថា បទល្មើសដែលកំពុងកើតឡើងនៅក្នុងដែនទឹកស្រុកបុរីជលសា និងស្រុកអង្គរបុរី មានជនជាតិវៀតណាមកាន់តែច្រើនក្នុងមួយថ្ងៃៗ ចូលមកធ្វើសកម្មភាពនេសាទជាចំហរ ។ ពួកគេចូលមកតាមទូកពេលព្រឹក និងត្រឡប់ទៅវិញពេលល្ងាច ។ បណ្តាអ្នកនេសាទវៀតណាមទាំងនោះមានប័ណ្ណ ចេញចូល ដែលអនុញ្ញាតដោយសមត្ថកិច្ច ។ ប័ណ្ណមួយសន្លឹក ត្រូវបានគេចេញឲ្យ ជាសម្គាល់សម្រាប់ជនជាតិវៀតណាមក្នុងការចូលមកនេសាទ ក្នុងដែនដីខ្មែរ ។ ក្រៅពីការចូលមកពេលព្រឹក ចេញពេលល្ងាច ក៏មានបណ្តាជនវៀតណាមចូលមកស្នាក់នៅជាប្រចាំ ដើម្បីនេសាទដែលមានទ្រង់ទ្រាយធំ ដូចជាការដាក់ដាយ អួនសៃយ៉ឺន និងរបាំងព្រួលជាដើម ។ បើទោះបីមានការតវ៉ាពីប្រជានេសាទខ្មែរ ស្នើសុំឲ្យអាជ្ញាធរ ពិសេសមន្ត្រីជំនាញមានវិធានការទប់ស្កាត់យ៉ាងណាក៏ដោយ តែគ្មានប្រសិទ្ធភាពដែរ ។ ផ្ទុយទៅវិញ បើប្រជានេសាទខ្មែរ នៅក្នុងស្រុកអង្គរបុរី ប្រើឧបករណ៍នេសាទខុសច្បាប់ដូចជា សៃយ៉ឺនស្បៃមុង សំណាញ់សាច់អួនក្រឡាញឹកខ្នាតតូច មិនបានទេ អាជ្ញាធរ និងមន្ត្រីជំនាញចុះបង្ក្រាបកាប់ប្រមូលដុតចោលភ្លាមៗ មិនខាន ប៉ុន្តែជនជាតិវៀតណាមរាប់សិបទូក ឆ្លងចូលមកនេសាទដោយប្រើឧបករណ៍សៃយ៉ឺនស្បៃមុង និងសំណាញ់សាច់អួនក្រឡាញឹកខ្នាតយក្ស ដែលមានរបាំងធ្នួសជាច្រើនខ្សែ ក្នុងមួយខ្សែ មានប្រវែងរាប់ពាន់ម៉ែត្រ ដែលជនជាតិវៀតណាម រាយដាក់នៅក្នុងបឹងចាប់ទឹកដី ឃុំគោកធ្លក ស្រុកអង្គរបុរី រហូតទៅដល់ស្រុកបុរីជលសានោះ អាជ្ញាធរ និងមន្ត្រីជំនាញហាក់ធ្វើមិនដឹង ហាក់មើលរំលង និងបណ្តោយឲ្យកើតមានជារៀងរាល់ឆ្នាំទៅវិញ ៕