ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានមានប្រសាសន៏ថា ចាប់ពីឆ្នាំ ២០២០ខាងមុខនេះ ឆែក សម្រេចផ្តល់ជំនួយអភិវឌ្ឍន៍គម្រូដល់កម្ពុជាក្នុងមួយឆ្នាំ ១,៥លានដុល្លារ។
យោតាមហ្វេសប៊ុករបស់ សម្ដេច តេជោ កាលពីថ្ងៃទី១៣ ខែតុលា ឆ្នាំ២០១៩ បានឲ្យដឹងថា តាមកម្មវិធីគឺ សម្តេចតេជោ គ្រោងនឹងអញ្ជើញទៅទស្សនាទីក្រុងចាស់របស់ប្រទេសឆែក ប៉ុន្តែ សម្តេចតេជោ បានលុបចោលកម្មវិធីនេះ ហើយបានអញ្ជើញ ផ្តល់កិត្តិយសជួបជុំជាមួយបងប្អូនខ្មែរដែលបានមករង់ចាំទទួលសម្តេចវិញ។
ក្នុងកម្មវិធីជួបជុំជាមួយបងប្អូនខ្មែរនោះផងដែរ សម្តេចតេជោ ហ៊ុន សែន បានកោតសរសើរដល់កូនក្មួយសិស្ស និស្សិតដែលមានឱកាសបានសមកសិក្សា នៅប្រទេសដែលមាន ការរីកចម្រើនដូចប្រទេសឆែកនេះ។នេះជាមោទនភាព របស់កម្ពុជា ដែលមានធនធានមនុស្សកំពុងបណ្តុះបណ្តាលនៅគ្រប់ទីកន្លែងទាំងក្នុងនិងក្រៅប្រទេស។ ទោះបីមិនបាននៅ ជាមួយបងប្អូនដោយផ្ទាល់ ប៉ុន្តែក្នុងនាមនាយករដ្ឋមន្រ្តីគឺសម្តេច ប្រមុខដឹកនាំតែងតែនឹករឮកនិងស្រឡាញ់បងប្អូនប្រជាពលរដ្ឋខ្មែរទាំងអស់ មិនថាតែនៅក្នុងប្រទេសឆែកនេះទេ។
សម្ដេចបន្ថែមថា “តាមពិតទៅប្រទេសកម្ពុជានិងឆែកគឺមានទំនាក់ទំនងល្អជាមួយគ្នាតាំងពីរវាងឆ្នាំ ១៩៦០ មកម៉្លេះ ហើយអតីត ព្រះករុណាព្រះបាទសម្តេចព្រះ នរោត្តម សីហនុ ព្រះបរមរតនកោដ ក៏ធ្លាប់ជានិស្សិតសិក្សានៅប្រទេសឆេកូនេះផងដែរ។ ទំនាក់ទំនងការទូតរវាងប្រទេសយើងទាំងពីរគឺល្អ ជាពិសេសគឺចាប់តាំងពីឆ្នាំ ១៩៧៩-១៩៩០ ដែលពេលនោះ រដ្ឋាភិបាលកម្ពុជាបានបញ្ជូននិស្សិតមកសិក្សានៅទីនេះបានច្រើនតាមរយៈអាហារូបករណ៍ដែលកម្ពុជាទទួលបាន។ អតីតស្ថានទូតប្រទេសឆែកពីមុន គឺមានទីតាំងនៅស្ថានទូត អឺរ៉ុបសព្វថ្ងៃនេះឯង។ ប្រទេសឆែកក៏មានទំនាក់ទំនងល្អជាមួយអាស៊ានដែរ ហើយទន្ទឹមនឹងនេះ ឆែក បានសម្រេចផ្តល់ជំនួយអភិវឌ្ឍន៍គម្រូដល់កម្ពុជាក្នុងមួយឆ្នាំ ១លានដុល្លាកន្លះចាប់ពីឆ្នាំ ២០២០ខាងមុខនេះ”។
ឆ្លៀតនៅក្នុងឱកាសនេះដែរ សម្តេចតេជោនាយករដ្ឋមន្រ្តី បានជម្រាបប្រាប់ដល់បងប្អូន និងកូនក្មួយនិស្សិតនៅឆែកអោយបានដឹងពីការទទួលទានអំបុកទូទាំងប្រទេសនៅថ្ងៃទី ៩ វិឆ្ឆិកា ២០១៩ ដែលត្រូវចំថ្ងៃឯករាជ្យជាតិ និងបន្តដោយថ្ងៃបុណ្យអុំទូក អកអំបុក និងសំពះព្រះខែ (៩-១០-១១-១២ វិច្ឆិកា ២០១៩) ដែលកម្ពុជាបានសម្រេចយកថ្ងៃនេះជាទិវាហូបអំបុក ទូទាំងប្រទេសដើម្បីការពារជាតិ សាសនា និងព្រះមហាក្សត្រ ព្រោះមានជនអគតិមួយចំនួនតូចបានឃោសនា គ្រោងយកថ្ងៃនេះធ្វើផ្តេសផ្តាស ក្នុងពេលដែលកម្ពុជាកំពុងរៀបចំពិធី អបអរសាទរពិធីបុណ្យឯករាជ្យជាតិ និងប្រពៃណីជាតិ។ ដូច្នេះ សូមអញ្ជើញបងប្អូននិងកូនក្មួយនៅទីនេះ និងនៅតាមបណ្តាប្រទេសនានាចូលរួមទាំងអស់គ្នានៅថ្ងៃទី ៩ វិច្ឆិកា ២០១៩ ។
មុននឹងបញ្ចប់ សម្តេចតេជោ ហ៊ុន សែន បានបញ្ជាក់ពីគោលជំហរក្នុងកិច្ចសហប្រតិបត្តិការជាមួយប្រទេសឆែក ដែលនឹងត្រូវពិភាក្សាគ្នាអោយបានល្អិតល្អន់នៅថ្ងៃស្អែកជាផ្លូវការ។ សម្តេចប្រមុខដឹកនាំ បានផ្តាំផ្ញើដល់បងប្អូនខ្មែរ និងកូនក្មួយនិស្សិតដែលកំពុងសិក្សានៅប្រទេសគេយកចិត្តទុកដាក់សិក្សារៀនសូត្រ និងគោរពច្បាប់ប្រទេសគេអោយបានល្អ។ ទន្ទឹមនឹងនោះដែរ សម្តេចតេជោ បានផ្តល់ទឹកប្រាក់ឧបត្ថម្ភលើកទឹកចិត្តដល់ក្មួយៗ ដែលកំពុងសិក្សានៅទីនេះប្រកបដោយក្តីស្រឡាញ់ក្នុងបរិយាកាសរីករាយនិងស្និទស្នាលក្រៃលែង៕
