ខេត្តព្រះសីហនុ ៖ របាយការណ៍ពីកងរាជអាវុធហត្ថខេត្តព្រះសីហនុ បានឲ្យដឹងថា សមត្ថកិច្ចអាវុធហត្ថខេត្តព្រះសីហនុ បានចុះត្រួតពិនិត្យ ឆែកឆេរអាវុធជាតិផ្ទុះ និងរថយន្ត ស្លាកលេខ ខេមរភូមិន្ទ (ខ.ម ) មកណែនាំអប់រំ និងធ្វើការកិច្ចសន្យា ។
ប្រតិបត្តិការនេះធ្វើឡើងតាមបទបញ្ជាលោកឧត្តមសេនីយ៍ត្រី ហេង ប៊ុនទី មេបញ្ជាការកងរាជអាវុធហត្ថខេត្តព្រះសីហនុ កាលពីរសៀលថ្ងៃទី១០ ខែតុលា ឆ្នាំ២០១៩ នៅចំណុចបុរីគុជអាស៊ី សង្កាត់លេខ៣ ក្រុងព្រះសីហនុ ។
ជាលទ្ធផល កងរាជអាវុធហត្ថខេត្តព្រះសីហនុ បានត្រួតពិនិត្យរថយន្តសរុបចំនួន១២១គ្រឿង ត្រួតពិនិត្យរថយន្តស្លាកលេខ ខ.ម ចំនួន៣គ្រឿង (ស្លាកលេខខេមរភូមិន្ទ) ត្រួតពិនិត្យ និងបកស្កុតខ្មៅកញ្ចក់ឡាន មានចំនួន២៤គ្រឿង ។
ប្រតិបត្តិការនេះដើម្បីធានាទប់ស្កាត់រាល់បទល្មើសផ្សេងៗ ការពារសន្តិសុខ សុខសុវត្ថិភាព រក្សាសណ្តាប់ធ្នាប់ ជូនដល់ភ្ញៀវទេសចរជាតិ-អន្តរជាតិ អ្នកជំនួញ ពាណិជ្ជករ បងប្អូនប្រជាពលរដ្ឋ ឱ្យទទួលបានភាពកក់ក្តៅ មានភាពសប្បាយរីករាយ និងកាត់បន្ថយគ្រោះថ្នាក់ជាយថាហេតុ ៕
