រាជធានីភ្នំពេញ ៖ នៅថ្ងៃទី៨តុលានេះ មន្ត្រីជាន់ខ្ពស់ ក្រសួងធនធានទឹក បានអះអាងថា ស្ថានភាពកម្ពស់ទឹកទន្លេសាប នឹងមិនធ្វើឲ្យប៉ះពាល់ធ្ងន់ធ្ងរដល់ព្រះរាជពិធីបុណ្យអុំទូកបណ្តែតប្រទីប អកអំបុក និងសំពះព្រះខែ ដែលនឹងត្រូវរៀបចំធ្វើឡើងនៅខែវិច្ឆិកា ឆ្នាំ២០១៩ នៅខាងមុខ ព្រះបរមរាជវាំង នោះទេ ។
លោក ចាន់ យុត្ថា អ្នកនាំពាក្យក្រសួងធនធានទឹក និងឧតុនិយម ប្រាប់ថា តាមការព្យាករណ៍ទៅដល់ថ្ងៃរៀបចំព្រះរាជពិធីបុណ្យអុំទូក នៅពេលខាងមុខនោះ កម្ពស់ទឹក នៅស្ថានីយជលសាស្ត្របាសាក់ចតុមុខ ចំណុចមុខព្រះបរមរាជវាំង នឹងមានកម្ពស់ស្ថិត ក្នុងរង្វង់ពី៤ម៉ែត្រ៧០ ទៅ៤ម៉ែត្រ៨០ កម្ពស់ទឹកនេះ នឹងមិនធ្វើឲ្យរាំងស្ទះដល់ព្រះរាជពិធីប្រណាំងទូក ដែលនឹងត្រូវចាប់ផ្តើមពីថ្ងៃទី១០ វិច្ឆិកា ២០១៩ នោះឡើយ ។
គួរជម្រាបថា កម្ពស់ទឹកដែលល្អបំផុត គឺចាប់ពី៦ម៉ែត្រកន្លះ ទៅ៧ម៉ែត្រ ព្រោះកាលណាទឹកខ្ពស់ ផ្ទៃទន្លេទាំងមូលមើលទៅឃើញធំទូលាយ ហើយទឹកក៍ហូរខ្លាំងដែរតែបើទឹករាក់វិញ គឺមើលទៅឃើញផ្ទៃទន្លេរាងតូច ហើយល្បឿនទឹកហូរក៍យឺតដែរ ។ ប៉ុន្តែបើទោះជាយ៉ាងណាក៍ដោយ សម្តេចតេជោ ហ៊ុន សែន បានប្រកាសជា សាធារណៈរួចហើយថា ព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ ឆ្នាំ២០១៩នេះ ទោះជាទឹកទន្លេស្រកចុះ នៅត្រឹម១ម៉ែត្រ ក៍ដោយ ក៍ត្រូវតែធ្វើដែរ ៕
