ស្វាយរៀង ៖ មនុស្សប្រុសស្រីដែលជាបម្រើការងារជាបុគ្គលិក ក្នុងហាងខារ៉ាអូខេ «ហ្វាងថាងល៊ាំងហ្វាន់ស័រ» ចំនួន២៤នាក់ ក្នុងនោះមានជនជាតិចិន៤នាក់ បានពុលអាហារ ប្រកាច់ក្អួតចង្អោរ វិលមុខ ត្រូវបានបញ្ជូនមកសង្គ្រោះនៅគ្លីនិកឯកជនមួយ នៅក្រុងបាវិត ។
ហេតុការករណីពុលនេះដែរ បានកើតឡើងនាវេលាម៉ោង០១និង៣០នាទីយប់ ឈានចូលថ្ងៃទី០៧ តុលា ២០១៩ នៅចំណុចខារ៉ាអូខេ «ហ្វាងថាងល៊ាំងហ្វាន់ស័រ» ដែលមានថៅកែជាជនជាតិចិន ស្ថិតក្នុងភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង ។
សូមជម្រាបថា ការពុលនោះមានអាការក្អួតចង្អោរ វិលមុខ ថប់ដង្ហើម ដោយឃើញបុគ្គលិកមិនស្រួលខ្លួនបែបនេះ ទើបមេការខារ៉ាអូខេ បញ្ជូនមកសង្គ្រោះបន្ទាន់ នៅគ្លីនិកឯកជនមួយកន្លែង នៅក្រុងបាវិតតែម្តង ។ ក្រោយសង្គ្រោះ មានបុគ្គលិកចំនួន១៤នាក់ បានចេញពីគ្លីនិក នៅសល់តែ១០នាក់ទៀតមិនទាន់បានធូរស្បើយ បន្តនៅសម្រាកព្យាបាលបន្តទៀត ។
ពាក់ព័ន្ធនឹងករណីនេះ មន្ត្រីសុខាភិបាលខេត្តស្វាយរៀង នៅព្រឹកថ្ងៃទី៨ ខែតុលា ឆ្នាំ២០១៩នេះ បានចុះទៅពិនិត្យរកមូលហេតុ ដែលនាំឲ្យពុលអាហារនៅហាងខារ៉ាអូខេ «ហ្វាងថាងល៊ាំងហ្វាន់ស័រ» ប៉ុន្តែខាង KTV ប្រាប់ថា មិនទាន់ដល់ម៉ោងចូលធ្វើការទេ ហើយក៏គ្មានអ្នកបកប្រែផងដែរ ពោលគឺមិនអោយចូលតែម្តង ។ ចំណែកឯអាជ្ញាធរ និងសមត្ថកិច្ចក្រុងបាវិតវិញ បានត្រឹមតែឆ្លើយបន្តាក់គ្នាដូចខ្ចង មិនទាន់អាចសហការទេ ។ ដោយគ្មានអ្នកចូលរួម ទើបមន្ត្រីពេទ្យ បានដកថយទៅវិញរង់ចាំបទបញ្ជាថ្មីពីថ្នាក់ដឹកនាំ ។
ប្រការនេះហើយធ្វើអោយប្រជាពលរដ្ឋ និងមជ្ឈដ្ឋានមួយចំនួនបានលើកឡើងថា អាជ្ញាធរ និងសមត្ថកិច្ចក្រុងបាវិត មិនសូវសហការជាមួយមន្ត្រីជំនាញនោះទេ ។
ទោះជាយ៉ាងណា នៅរសៀលថ្ងៃទី0៨ ខែតុលានេះ អ្នកសារព័ត៍មានKBN មិនអាចរកការបំភ្លឺ ពីថៅកែខារ៉ាអូខេជនជាតិចិនខាងលើនៅឡើយទេថា តើបណ្តាលមកពីអ្វីឲ្យពិតប្រាកដនោះ ។
ដោយឡែក មតិមហាជនដែលរស់នៅក្រុងបាវិត បានអោយនិយាយតៗគ្នាថា ទំនិញជាច្រើន បានឆ្លងកាត់មកពីប្រទេសជិត ខាងពុំមានជំនាញណាមួយ បានត្រូតពិនិត្យត្រឹមត្រូវច្បាស់លាស់នោះឡើយ ហើយឈ្មួញដឹកតាមច្រកមួយចំនួន ដោយលូចលាក់ទៀតផង ពួកគាត់សព្វថ្ងៃនេះ មានការព្រួយបារម្មអំពីបញ្ហាសុខភាពចំពោះចំណីអាហារគ្រប់ប្រភេទ ៕