ខេត្តកំពត ៖ យុវជនម្នាក់ឈ្លក់ទឹកស្លាប់ ដោយសារបើករថយន្តក្នុងស្ថានភាពស្រវឹង បានជ្រុលធ្លាក់ផ្លូវ ចូលស្នាមភ្លោះដែលមានទឹក នៅតាមបណ្តោយផ្លូវជាតិលេខ៣ ។
ហេតុការណ៍នេះបានកើតឡើងកាលពីយប់ថ្ងៃទី៦ ខែតុលា ឆ្នាំ២០១៩ ស្ថិតក្នុងភូមិព្រែកអម្ពិល ឃុំកោះតូច ស្រុកទឹកឈូ ត្រង់ចំណុចផ្លូវកោងមុខប៉ុស្តិ៍នគរបាលរដ្ឋបាលមូលដ្ឋាន ។
ជនរងគ្រោះដែលបាត់បង់ជីវិតមានឈ្មោះ នួន ចន្ទ្រា អាយុ២២ឆ្នាំ មានទីលំនៅភូមិកន្ទួត ឃុំកន្ទួត ស្រុកស្វាយលើ ខេត្តសៀមរាប មកស្នាក់នៅភូមិគីឡូដប់ពីរ ឃុំកោះតូច ស្រុកទឹកឈូ ខេត្តកំពត ។
បើតាមសក្សីនៅកន្លែងកើតហេតុ ប្រាប់អោយថា មុនកើតហេតុ គេឃើញរថយន្តប្រភេទបែនដឹកដីមួយគ្រឿង បើកមកពីទិសខាងកើត ក្នុងល្បឿនយ៉ាងលឿន ។ លុះដល់ចំណុចផ្លូវកោង រថយន្តក៏បានជ្រុលធ្លាក់ក្នុងស្នាមភ្លោះដែលមានទឹក រួចស្ងាត់ស្នូរឈឹង ។ ភ្លាមៗ អ្នកជិតខាងបានចូលទៅជួយដែរ តែដោយស្ថានភាពពិបាកទើបអូសបន្លាយពេលយូរបណ្តាលឱ្យអ្នកបើកបរឈ្លក់ទឹកស្លាប់តែម្តង ។
ប្រភពដដែល បានបញ្ជាក់ថា អ្នកបើកបររថយន្តរូបនោះស្ថិតក្នុងសភាពស្រវឹងខ្លាំង ៕
