ខេត្តត្បូងឃ្មុំ ៖ ច្រាំងទន្លេមេគង្គ ដែលបាក់ស្រុតមានប្រវែងជាង១គីឡូម៉ែត្រហើយ កំពុងតែបន្តបាក់ចូលទឹកទន្លេជាបន្តបន្ទាប់ ជាច្រើនកន្លែងទៀត ធ្វើឲ្យប៉ះពាល់ដល់លំនៅដ្ឋានពលរដ្ឋមួយចំនួន ពិសេស វត្តរការធំ ស្ថិតក្នុងភូមិរការធំ ឃុំជីរោទិ៍ទី១ ស្រុកត្បូងឃ្មុំ ខេត្តត្បូងឃ្មុំ ។
ព្រះចៅអធិការវត្តរការធំ ព្រះគ្រូ គា សុគន្ធ បានមានថេរដីការថា ដីទីធ្លាវត្តនេះ ពីមុនមានទទឹងប្រវែង៩៨ម៉ែត្រ បណ្ដោយប្រវែង២១០ម៉ែត្រ តែពេលនេះនៅសល់បណ្ដោយតែ៤០ម៉ែត្រទេ ។
ព្រះអង្គ បន្តថា ច្រាំងទន្លេមេគង្គ បានបន្តបាក់តាំងពីទឹកឡើងរហូតទឹកស្រក ជាហេតុធ្វើឲ្យប៉ះពាល់ ដល់កុដិថ្ម និងសាលាឆាន់ យ៉ាងធ្ងន់ធ្ងរ តែត្រូវបានកម្លាំងសហការ មានបងប្អូនប្រជាពលរដ្ឋ អាជ្ញាធរ ភូមិឃុំស្រុក កម្លាំងកងទ័ពយោធិភូមិភាគ២ ជួយរុះរើ រំដោះបានយ៉ាងទាន់ហេតុការណ៍ បញ្ហាប្រឈមនេះ ព្រះចៅអធិការវត្តរការធំ បានសំណូមពរដល់សប្បុរសជន អាជ្ញាធរខេត្ត ប្រមុខរាជរដ្ឋាភិបាលមេត្តាជួយរកទីតាំងថ្មីសម្រាប់កសាងវត្តរការធំនេះផង ទុកសម្រាប់ពលរដ្ឋគោរពប្រណិបត្តិសាសនា ៕