រាជធានីភ្នំពេញ ៖ ពិតជាដំណឹងមួយគួរឲ្យតក់ស្លុតបំផុត ដែលនាយ សាន ម៉ៅ តារាកំប្លែងដ៏ល្បីមួយរូបរបស់កម្ពុជា បានទទួលមរណភាពនៅឯមន្ទីរពេទ្យប្រទេសថៃ នាម៉ោង៦ល្ងាច ថ្ងៃទី០២ ខែតុលា ឆ្នាំ២០១៩នេះ ។
បើយោងតាមអ្នកនាង ចន ច័ន្ទលក្ខិណា ប្រធានសមាគមសិល្បករខ្មែរ បានសរសេរសារ នៅក្នុងបណ្តាញសង្គម មុននេះបន្តិចថា «ក្នុងនាមនាងខ្ញុំជាប្រធាន សមាគមសិល្បករខ្មែរ សូមចូលរួមរំលែកទុក្ខដ៏ក្រៀមក្រំ បំផុតដែលលោកពូ សាន ម៉ៅ បានទទួលមរណៈភាពនៅវេលាម៉ោង៦ល្ងាចនៅឯមន្ទីរពេទ្យនាប្រទេសថៃ ។
ក្មួយពិតជាស្លុតចិត្តណាស់ពេលដែលបានទទួលដំណឹងដ៏សោកសៅនេះ ការចាកចេញរបស់លោកពូ គឺជាក្តីសោកសង្រេងជាទីបំផុតដែលក្នុងនាមជាក្មួយ ជាសិល្បការនីជំនាន់ក្រោយ ដែលតែងតែគោរពបដិបត្តិ រៀមច្បងដ៏ល្អម្នាក់ ។ យើងទាំងអស់គ្នាបានបាត់បង់តារាកំប្លែងជើងចាស់ខ្មែរដ៏ល្បីប្រចាំប្រទេសកម្ពុជាមួយរូបទៀតហើយ ។ សូមវិញ្ញាណក្ខន្ធលោកពូ បានទៅកាន់សុគតិភព ទោះលោកពូបានលាចាកលោកនេះ មែនតែស្នាដៃសិល្បៈរបស់លោកពូ ស្ថិតក្នុងដួងចិត្តប្រជាជនខ្មែរជានិច្ច» ។
យ៉ាងណាមកដល់ម៉ោង៩យប់នេះ អ្នកយកព័ត៌មានរបស់ KBN នៅមិនទាន់អាចទាក់ទងក្រុមគ្រួសារនាយ សាន ម៉ៅ បាននៅឡើយទេ ។
គួរបញ្ជាក់ផងដែរថា តារាកំប្លែងរូបនេះ បានធ្លាក់ខ្លួនឈឺអស់រយៈពេលច្រើនខែណាស់មកហើយ ជាមួយនឹងជំងឺច្រើនមុខ ដូចជា លើសឈាម ទឹកនោមផ្អែម ជាពិសេសជំងឺសួតធ្ងន់ដែលតម្រូវឲ្យដាក់អុកហ្ស៊ីសែនជាប្រចាំ រហូតលោក ត្រូវចោះបំពង់កទៅទៀត ធ្វើឲ្យលោកមិនអាចនិយាយបាន។ ហើយមួយរយៈចុងក្រោយ ជំងឺលោកសាន ម៉ៅ នៅតែមិនអាចធូរស្រាលនៅឡើយទេ ពោលគឺស្ថិតក្នុងលក្ខណៈធ្ងរ ទើបក្រុមគ្រួសារសម្រេចបញ្ចាំរបស់របរមានរថយន្ត និងប្លង់ដី ដើម្បីនាំយករូបលោកចេញទៅព្យាបាលនៅប្រទេសថៃ ក្នុងក្តីសង្ឃឹមចុងក្រោយ តែជាអកុសល នៅថ្ងៃនេះ តារាកំប្លែងដ៏ល្បី ប្រចាំប្រទេសកម្ពុជា សាន ម៉ៅ បានទទួលមរណភាព ៕